Kimün ki gönli vü cânı cihânda câha düşer

 
 
 
Gazel
 
Kimün ki gönli vü cânı cihânda câha düşer
Bilün ki togru yolından sapar o çâha düşer
 
Ne denlü âlim ü âbid olursa dünye seven
Ne yirde yürürise varta-i günâha düşer
 
Ko kibr ü ucbunı i bî-edeb ululanma
Ki ululuk hemîn ol bâki pâdişâha düşer
 
Ne kul ki şâh yasagın sır emrini tutmaz
Bilün ki âkıbet ol kimse hışm-ı şâha düşer
 
Zehî delü ki varur bir harâm lokmayiçün
O pâdişâhanı kor hizmet-i sipâha düşer
 
O bire kul olan olur iki cihân şâhı
Yog ol ki dâne sanup dâm-ı taht-gâha düşer
 
Safâyıla dü cihândan giçen olur sâfî
Yog ol ki hırsıla bir vakf hâne-kâha düşer
 
Şu degme fâsıka âşık dimen ki gönli anun
Hak’un likâsını kor degme bir tebâha düşer
 
Muvahhidem diriken Lâ İlâhe İlla’llâh
Ya nîşe müşrik olur gönli cüzü’llâha düşer
 
Sipîd-rûlara hiç vâki’ olmaz ol zillet
Girü o vâkı’a her çeşm ü rû-siyâha düşer
 
Bil âdemîler işidür riyâzet ü perhîz
Hemân bizüm bigi hayvân alîk-gâha düşer
 
Kaçup sıgındugı yirde bulup durur her gâh
Ecel şu kimseleri kim kaçar penâha düşer
 
Ömür kısalıgını anlayan bu âlemde
Dirâz-ı fikri kor endîşe-i kutâha düşer
 
Ne denlü aczi vü fakrı olursa yol erinün
Ne gönli mâla vü ne hil’at u külâha düşer
 
Hevâ vü hırsı koyanlar delîle uyanlar
İrişdi menzile anlar ki togru râha düşer
 
Ol ulu şâhı seveli bu bende Ümmî Kemâl
Firâk u derdile aglar figân u âha düşer
 
Bu yir ü gök dün ü gün ay u günden aydın olur
Zehî likâ ki anun nûrı şems ü mâha düşer
 
Yavuzer, Hayati (1997). Kemal Ümmi Divanı. Doktora TeziAnkara: Gazi Üniversitesi. 518-519.
 

Şairin Diğer Şiirleri


Sitedeki yazıların tüm hakları ve sorumluluğu yazı sahiplerine aittir. Yazıların izin alınmadan kopyalanması ve kullanılması 5846 sayılı Fikir ve Sanat Eserleri Yasasına göre suçtur. Aksi davranışlara karşın yasal işlemlere başvurulacaktır.

Yapılan Yorumlar

Henüz yorum yapılmamış...

Yorum Yaz

Yorum yazmak için üye girişi yapınız...