Hezârân şükr ile minnet ki irişdük bu devrâna


Esa
1.4.2018
 
 
Hezârân şükr ile minnet ki irişdük bu devrâna
Yine evvel bahâr oldı virelüm cânı şükrâne

Cihân bâg-ı cinân oldı hayât-ı câvidân buldı
Yine kutlu zamân oldı irişdi mürdeler câna

Çemenler oldı hep cennet fütûh-ı rûhadur râhat
Gerek ise sana hikmet sehergeh gir gülistâna

Gül ile berg-i nesrînler açılmışdur reyâhînler
Boyanup goncalar kana yatur mahmûr ü mestâne

Kaçurma fursatı elden fenâ olmazdan ön bir dem
Koma peymâneyi elden tolınca tâ ki peymâne

Getür sâkî mey-i bâkî ki arşa uralum sâkı
Mu‘attar eyle âfâkı mu‘anber zülfe ur şâne

Çalınsun çeng ile neyler bugün ayş itmeyen n’eyler
Hemân tazyî‘-i ömr eyler oluban garra devrâna

Ne cân sûretlü dilbersin diyâr içinde dâversin
Ali heybetlü serversin ki sûr-ı pâdişâhâne

Niçe furkat niçe mihnet gelür şâdî gider gussa
Bihamdillâh bugün Gavrî irişdi gene cânâna
 
Şeyhoglu’nun  gazeline karşı nazire
 
 (Yavuz 2002: 94-96)

Sitedeki yazıların tüm hakları ve sorumluluğu yazı sahiplerine aittir. Yazıların izin alınmadan kopyalanması ve kullanılması 5846 sayılı Fikir ve Sanat Eserleri Yasasına göre suçtur. Aksi davranışlara karşın yasal işlemlere başvurulacaktır.


Henüz yorum yapılmamış