Mef`ûlü mefâ`îlü mefâ`îlü fa`ûlün
1 Berg-i zer-i pür-nakş ile gülşende vezândur
Gûyâ ki sabâ gâşiye ber-dûş-ı hazândur
2 Gerdân ider evrâkı sabâ sahn-ı çemende
Cevlâna gelür şevk ile tâvûs-ı cinândur
3 Zer tepsiler atılmada meydân-ı çemende
Hengâm-ı `atâ sûr-ı şeh-i`âlemiyândur
4 Sarı saman altında su yürütmede mâhir
Hakkâ ki hazân faslı da kallâş-ı cihândur
5 Evrâk döner şevk ile fânûs-ı hayâle
Seyr it ne suver zâhir olur devr-i zamândur
6 Nakşını çıkarduk hele sûdâger-i bâgun
Bildük ki anun eyledügi sûd-ı ziyândur
7 Yahyâ varak-ı bîdi gör e nice sarardı
Geç `ayş u safâdan ki hilâl-i Ramazândur
Hasan KAVRUK , ŞEYHÜLİSLAM YAHYÂ DÎVÂNI, T. C. KÜLTÜR VE TURİZM BAKANLIĞI KÜTÜPHANELER VE YAYIMLAR GENEL MÜDÜRLÜĞÜ 3147