Mef`ûlü fâ`ilâtü mefâ`îlü fâ`ilün
1 Hem-râh idüp adûları hoş-hâl ider yürür
Hâk-i reh-i mahabbeti pâ-mâl ider yürür
2 Ümmîdvâr vaslun önünce kaçar müdam
Seyr eylenüz ol lâle-ruhı âl ider yürür
3 Ahd eylemişdi gelmege eglendi gelmedi
Ol şâh-ı hüsn gelmede ihmâl ider yürür
4 Ol şâhı âh u nâle yürütmez belâ budur
Varur rakîb yanına idlâl ider yürür
5 Hicriyle bî-karâr idügin yâre arz içün
Yahyâ sirişk-i çeşmini irsâl ider yürür
Hasan KAVRUK , ŞEYHÜLİSLAM YAHYÂ DÎVÂNI, T. C. KÜLTÜR VE TURİZM BAKANLIĞI KÜTÜPHANELER VE YAYIMLAR GENEL MÜDÜRLÜĞÜ 3147