Mef`ûlü fâ`ilâtü mefâ`îlü fâ`ilün
1 Hum içre cûş ider mey-i pür-şûr mest olur
Bezm ehlini yıkar bu ne pür-zûr mest olur
2 Şemşîr elinde fitne vü âşûba başladı
Çeşmi de gamzesi gibi meşhûr mest olur
3 Aldanma çeşm-i dil-beri gördünse nâ-tüvân
Ey dil sakın ki bir gün o mahmûr mest olur
4 Döymez Kelîm şa`şa`a-i câm-ı vasluna
Bir lem`ası tokunmagile Tûr mest olur
5 Şâyed ki bir tevâzu`-ı mestâne eyleye
Yahyâ kaçan o dil-ber-i magrûr mest olur
Hasan KAVRUK , ŞEYHÜLİSLAM YAHYÂ DÎVÂNI, T. C. KÜLTÜR VE TURİZM BAKANLIĞI KÜTÜPHANELER VE YAYIMLAR GENEL MÜDÜRLÜĞÜ 3147