Mev’ize : Ol ki gözler rızâ-yı Rabb-i hakem
24.07.2017
7
Mev’ize
[ Fe’ilâtün Mefâ’ilün Fe’ilün]
· · − − / · − · − / · · −
1 Ol ki gözler rızâ-yı Rabb-i hakem
Aña teslîm ider özin her dem
Ola teslîm-ile rızâda o kim
Çekmez öz hâli içün aslâ gam
Cümle Hakdan bilür ne kim gelse
Eger ola eyü eger kim kem
Hakka eyler havâle her ciheti
Her cihetde olur özi epsem
5 Hakka tefvîz ider umûrını hep
Hak bu kim lâzım olan oldur hem
Pes o kim Hak-ile ola dâyim
Hakk dahı anuñ-ıladur her dem
Zî-sa’âdet aña kim ol hâli
42
İdebile idine kâr-ı ehem
Gelüñ ol hâli biz dahi görelüm
Bir mühim emr-i cümleden akdem
Hem degül mi rızâ-yı Mevlâya
‘Abde teslîm lâzım u elzem
10 Olalum sâlik-i tarîk-i Hudâ
Basalum ol yola yüz üzre kadem
Hâ uyub nefse niçe bir çekelüm
Her dem envâ’-ı gam hemîşe elem
Hod degül hîç kimseye bâkî
Güzerân üzredür hemîn ‘âlem
‘Adem-i feth-i bâb-ıla niçe bir
Kalbe kesr irüb ola gam aña ham
Her kapuya tapuya varmagla
Niçe bir imdi kaddümüz ola ham
15 Niçe bir böyle âh kendümüze
‘Irza noksân-ıla bu hayf-ı etemm
Turub ehl-i sitemden aglarken
Turmayub olavuz biz ehl-i sitem
Gelicek hod geliser elbette
Her ne kim yazmış-ısa başda kalem
İmdi el çekmege ayak basalum
Şol cihetden kim ola soñı nedem
İşbu karn içre hod aña birden
Olamaz kimseler karîn-i kerem
20 Kime bir kullıcak virem diseler
Çekdürürler virince renc-i verem
İş bu karn içre mi kırân girsün
Halk olardan ki;ola karîn-i elem
Zî-sa’âdet aña kan â’atle
Künc-i ‘uzletde ide bir hoş dem
‘Alemüñ her gam u belâsından
43
Kurtulub süre özge bir ‘âlem
Gamdan olub emîn ü ola hemîn
Harem-i vahdete düşüb hurrem
25 Çeküb il kesretinden el başdan
Harem-i vahddete ola mahrem
Mâ-hasal kâr-ı dünyevîde ola
Misl-i a’mâ vü ebkem ü hem asamm
Kâr-ı dünyâya hîç ider mi heves
Hâl-i ‘ukbâyı fikr iden âdem
Zî-sa’âdet bu dünyeden kişinüñ
Gele bir nefret-ile kalbine rem
Ne vücûdı var işbu dünyânuñ
Çünki fânîdür imdi soñı ‘adem
30 Dâr-ı dünyâda hod mukarrer âh
Soñı her sûruñ olısar mâtem
Hâl-i dünyâyı eyleye o ki fehm
Açmaz anuñ kelâmı içün fem
Diye her kim ki Hazret-i Hakkuñ
Lutf-ıla bir ‘inâyetine irem
Hak ta’âlânuñ emr ü nehyinden
Çıkmaz anı hemîn tutar muhkem
Dahı hem cân-ıla mahabbet-i Hakk
Olur anuñ dilinde müstahkem
35 Hakk ta’âlâ pes imdi lutfından
Virür anuñ bir özge derdine em
‘Âkıbet ol sa’âdet-ile irer
Kerem ü lutf-ı Hakka Hakk-ı â’lem
Ol sa’âdetden işbu Nazmî kuluñ
Eyleme dûr eyâ İlâh-ı hakem
Yrd. Doç. Dr. Sibel ÜST, EDİRNELİ NAZMÎ DÎVÂNI (İNCELEME-METİN) T. C. KÜLTÜR VE TURİZM BAKANLIĞI, 2012 www.kulturturizm.gov.tr
Yorum Yapmak için Kayıt Olun veya Giriş Yapın