Muhammes Sâkî-i bezm-i mey olub dâyimâ

Muhammes Der-ân Kâfiye Elif Revî

 [Müfte’ilün Müfte’ilün Fâ’ilün]

− · · − / − · · − / − · −

 -I-

 Sâkî-i bezm-i mey olub dâyimâ

 Döne döne anda sürersin safâ

 La’lüñ öper eller idüb merhabâ

 Cânuma olur benüm ol bir cefâ

 Baña cefâ eyleme hey bî-vefâ

 -II-

 Haste-i ‘aşka lebüñ emmekdür em

 Gayra dime anı sen ammâ ki em

 Cânuma zîrâ irer andan elem

 Cânuma cevr itmek-ile dem-be-dem

 Baña cefâ eyleme hey bî-vefâ

 -III-

 Seyre varub yürime agyâr-ıla

 Gül gibi salınma hemîn hâr-ıla

 Cilveyi ko şîve-i reftâr-ıla

 Cânumı gel salma gama zâr-ıla

 Baña cefâ eyleme hey bî-vefâ

 -IV-

 Ben ki görüb cân-ıla sevdüm seni

 Yol mı durur sevmeyesin sen beni

 Gözle güzel yoluña cân vireni

380

 Niçe cefâ cânuma lutfuñ kanı

 Baña cefâ eyleme hey bî-vefâ

 -V-

Şîveyi kâr idinüb iy şîve-kâr

 Niçe idersin beni karşuña zâr

 Olma beni terk idüb agyâra yâr

 Nazmiyem olsun saña varum nisâr

 Baña cefâ eyleme hey bî-vefâ

 

Yrd. Doç. Dr. Sibel ÜST, EDİRNELİ NAZMÎ DÎVÂNI (İNCELEME-METİN) T. C. KÜLTÜR VE TURİZM BAKANLIĞI, 2012 www.kulturturizm.gov.tr