Murabba’ Der-ân Kâfiye Tâ Harf Revî

 

Murabba’ Der-ân Kâfiye Tâ Harf Revî

 

 [Müfte’ilün Fâ’ilün Müfte’ilün Fâ’ilün]

− · · − / − · − / − · · − / − · −

 -I-

 

 Hak bu ki virmiş Hudâ hüsn ü melâhat saña

Şimdi müsellem durur cümle letâfet saña

 Hâsılı gözüm nazar itdügi sâ’at saña

 Cân-ıla dil dilberâ itdi mahabbet saña

 -II-

 Sevdürür elbette bu hüsn ü melâhat seni

 ‘Âşık olur her gören gördügi sâ’at seni

 Gördi ki pür-lutf bir kân-ı melâhat seni

 Cân-ıla dil dilberâ itdi mahabbet saña

 -III-

 Saña dil[i] vermişem cân-ıla bir ‘âşıkam

 Fikr ü hayâlüñdurur hem-demüm uş dem-be-dem

 Cân u dile lutf[ile] eyleme cevr ü sitem

 Cân-ıla dil dilberâ itdi mahabbet saña

 -IV-

 Sen ki bir âfet güzel diller alur hûbsın

 Yok bedelüñ hüsn-ile aşırı mahbûbsın

 Anuñ-içündür ki sen cân-ıla matlûbsın

 Cân-ıla dil dilberâ itdi mahabbet saña

 -V-

 Nazmiyem ol eyleyen saña hemîşe du’â

 Hüsnüñ içün okıyan şevk-ile medh ü senâ

 Cân u dili yoluña nola idersem fedâ

 Cân-ıla dil dilberâ itdi mahabbet saña

 

Yrd. Doç. Dr. Sibel ÜST, EDİRNELİ NAZMÎ DÎVÂNI (İNCELEME-METİN) T. C. KÜLTÜR VE TURİZM BAKANLIĞI, 2012 www.kulturturizm.gov.tr