Müstef`ilün müstef`ilün müstef`ilün müstef`ilün
1 Şîrîn dehânun dil-berâ ser-çeşme-i cân kendidür
Cânlar bagışlar sözlerün kim âb-ı hayvân kendidür
2 Bir âhen-i serd idi dil âşık degülken şimdi ol
Dükkân-ı âhengerdeki kânûn-ı sûzân kendidür
3 Bezm-i mey olmuş gülsitân ol bâga sâkî bâgbân
Her tolı sâgar hod hemân bir verd-i handân kendidür
4 Künc-i gam u endûhda kaldık za`îf u bî-mecâl
Sâkî getür sun sâgarı kim derde dermân kendidür
5 Yahyâ derûnun hânesin eyle dil ü cândan tehî
Sînende ol rûh-ı revân yetmez mi kim cân kendidür
6 Meddâh olursan Hazret-i Sultân Murâdun medhin it
Dünyâya feyz-i nûr iden hurşîd-i rahşân kendidür
7 Esb-i sebük-seyri sabâ zeyn-i semendi taht-ı zer
Ol pâdişâh-ı Cem-haşem hakkâ Süleymân kendidür
Hasan KAVRUK , ŞEYHÜLİSLAM YAHYÂ DÎVÂNI, T. C. KÜLTÜR VE TURİZM BAKANLIĞI KÜTÜPHANELER VE YAYIMLAR GENEL MÜDÜRLÜĞÜ 3147