Mef`ûlü fâ`îlâtü mefâ`îlü fâ`ilün
1 Söz kim zebânuma gele gûyâ zebânedür
Ben `âşıkam sözüm de benüm `âşıkânedür
2 `Aşık odur ki yâri işiginde cân vire
Mecnûn-ı gâfilün harekâtı yabânedür
3 Her kişi nakd-i cânını âmâde eylesün
Yârân-ı `aşk sohbetimüz `ârifânedür
4 `Arz-ı niyâzı bülbül-i zârun figân iledür
Pervâne-i belâ-zedenün yane yanedür
5 Yâr işigine tuhfe-i cân ile gelmeden
Mâksûd feyz-i cûdına Yahyâ bahânedür
Hasan KAVRUK , ŞEYHÜLİSLAM YAHYÂ DÎVÂNI, T. C. KÜLTÜR VE TURİZM BAKANLIĞI KÜTÜPHANELER VE YAYIMLAR GENEL MÜDÜRLÜĞÜ 3147