Nevrûziye Örnekleri

Nevrûziye Örnekleri

Fā˘ilātün Fā˘ilātün Fā˘ilātün Fā˘ilün

1. Çün çemen Firdevs olup ŝaģrā İrem bostānıdur
Ģūr u ġılmān ile˘işret ét ki dünyā fānidür
2. Ravża-i Rıēvān olupdur sāģat-ı gülzārı gör
Şāĥlar kāĥ-ı zeberced ġonceler vildānıdur
3. Bir zümürrüd soffadur gūyā ki ŝaģn-ı būstān
 Lāleler ol ŝoffanuŋ yāķūt şādırvānıdur
4. ˘Iyd-ı nevrūz oldı vü alnında šıfl-ı ġoncenüŋ
Şol ķızıl beŋ kim görinür tāze ķurbān ķanıdur
5. Def šutup güller olupdur nāy-ı bülbül naġme-sāz
 Serv-i dil-cū raķŝ urur ĥōş şādlıķ devrānıdur
6. Dün ŝular kim cām-ı İskender gibi olmışdı ĥuşk
 Sebzelerde şimdi Ĥıżruŋ çeşme-i ģayvānıdur
7. İrdi bir dūşìzedür ģadd-i bülūġa şāĥ-ı gül
 Sìnesinde ġonceler peydā olan pistānıdur
8. Zülf-i dilberden dil-ārālıķ šopın ebr-i bahār
Ķapmaġa bir lu˘b ile ķavs-i ķuzeĥ çevgānıdur
9. Sofralar açsa ŝabā yér yér ˘aceb mi ġonceden
 Çün şükūfe ravżanuŋ bir haftelik mihmānıdur
10. Āb cüllāb-ı revān-baĥş oldı beŋzer kim ŝabā
Şìşe-i ebri ele alup gül-āb-efşānıdur
11. Ŝad hezārān ŝūret-i çìn naķş édüp ŝu üzre bād
 Rūy-ı āb-ı lāciverdì Çìn nigāristānıdur
12. Şāĥlar ŝanma çiçeklenmiş alup dendānına
 Her şecer barmaġı ol ŝūretlerüŋ ģayrānıdur
13. Yire ezhār-ı şecerlerden niśār étdükçe bād
 Dökilür gökden kevākib ŝan ki maģşer ānıdur
14. Çün ayaġı baŝduġı yérler olupdur sebzezār
 Yaraşur serve eger dirsem ki Ĥıżr-ı śānìdür
15. Berķ u bārāndan ki dür-bār ü zer-efşāndur seģāb
Ŝan ki şāhuŋ dest-i zer-baĥş ü güher-efşānıdur
16. Sūz ile gül ĥusrevi bezminde bu şi˘ri oķur
 Bülbül-i şìrìn-nevā k’ol meclisüŋ ĥōş-ĥānıdur
17. Ol meh-i nā-mihribānuŋ çerĥ ser-gerdānıdur
Şems-i ˘ālem-tāb tāb-ı sìne-i sūzānıdur
18. Rişte-i ķadd-i dü-tām üzre dizilen ķanlu yaş
 Gūyiyā dil mürşidinüŋ ŝübģa-i mercānıdur
19. Nola ĥōş güftār ile sìnemde yér eylerse yār
Şìşeye girmek füsūn ile perìler şānıdur
20. Dūd-ı sürĥ ü sebz-i āhı ˘āşıķ-ı dil-ĥastenüŋ
 Būstān-ı derd-i ˘ışķuŋ lāle vü reyģānıdur
21. Āhuma raģm eyleyüp sāķın nola keşf eylese
 Dāmenin yél açsa šaŋ mı çünki gül dāmānıdur
22. Ŝorma bizden Cem ģikāyātın Ferìdūn ķıŝŝasın
 Bildügi ˘āşıķlaruŋ mihr ü vefā destānıdur
23. Olsa cānum mülkinüŋ šaŋ mı güzeller ģākimi
 Bülbülüŋ her gül çü göŋli taĥtınuŋ sulšānıdur
24. Şāĥ-ı gül tìr-i ġamuŋ mecrūģıdur cerrāģ-ı ĥār
 Mìl urup peykān çıķarmış ġonceler peykānıdur
25. Pür olup şebnemle nergesler ġamuŋdan her biri
 Eşk ile šolmış bahāruŋ dìde-i giryānıdur
26. Ġonceler açıldı ŝanma kim nihāl-i ķaddüŋüŋ
 Aġzın açmış şāĥ-ı güller vālih ü ģayrānıdur
27. Fitnedür çeşm-i siyāhuŋ anı ĥāb-ālūd éden
 Adl-i Sulšān Bāyezìd ibni Muģammed Ĥānìdür
28. Cāh ü ˘izzet menba˘ı lušf ü mürüvvet ma˘deni
 Mekrümet ebri ˘ašā baģri seĥāvet kānıdur
29. Ĥāk-i pāyi cevheri küģl-i cilā-yı ģūr-ı ˘ìn
Źāt-ı pāki ˘izz ü devlet ˘aynınuŋ insānıdur
30. Bārgāhınuŋ kemìn cārū-keşidür āfitāb
Āsitānınuŋ ķamer zerrìn-küleh derbānıdur
31. Baĥt-ı rūz-efzūnına šaŋ mı zebūn olsa felek
 K’ol cevān-ı tāze bu bir pìr-i köhne fānìdür
32. Ehl-i küfrüŋ ĥırmen-i ˘ömrine her dem od uran
 Berķ-ı ˘ālem-sūz-ı tìġ ü ĥançer-i bürrānıdur
33. Éy Sikender-ķadr ĥāk-i pāyüŋ öpmişdür meger
 Kim leb-i cānāne Ĥıżruŋ çeşme-i ģayvānıdur
34. Sensin ol şeh kim bihişt-i heşt bāġ-ı ķadrüŋüŋ
 Bir sekiz yapraķlu ferĥunde gül-i ĥandānıdur
35. Sensin ol kim şehsüvār-ı himmet-i vālāsınuŋ
 Māh-ı nev çevgānı gün šopı felek meydānıdur
36. Bì-sebeb zencìr urur ˘ahdüŋde çün ŝuya hevā
 Ger anı zindānlara ŝalsa ģabāb erzānìdür
37. Gözleri üstinde šutsa šaŋ mı müjgānın mülūk
 Sen melek-ĥūnuŋ çü cārūb-ı der-i eyvānıdur
38. İşigüŋde zìnet içün aŝılan šop āyine
 Baĥt ü devlet āsümānınuŋ meh-i tābānıdur
39. Ravża-i cāh ü celālüŋ kim ebed ma˘mūr ola
 Cennet-i Firdevs anuŋ bir kemterìn bostānıdur
40. Ayaġuŋ tozına ìśār étmege gül şāhınuŋ
Ġonce-i zerrìn elinde šolu zer hemyānıdur
41. Aġzına almış meh-i nevden taģayyür barmaġın
İrtifā˘-ı ķadrüŋüŋ beŋzer felek ģayrānıdur
42. Keffüŋe öykündügine baģr yāķūt ile la˘l
 Ma˘denüŋ cisminde ĥışmından ķurıyan ķanıdur
43. ˘Arş ayaġında ķılıcuŋdur şehā bir āb-ı tìz
 Kim bu fìrūze yédi dōlāb anuŋ gerdānıdur
44. Ne yére ˘azm eyleseŋ atuŋ ayaġı izinüŋ
 Her biri menşūr-ı fetģüŋ ķal˘a-i ˘unvānıdur
45. Ĥāne-i buĥl ü sitem bünyādını vìrān éden
Āb-ı tìz-i tìgüŋ ile cūduŋuŋ bārānıdur
46. Éy ŝıfātı Muŝšafā CA˘FER kemāl-i nažm ile
 Pārsüŋ Selmānı vü Tāzì dilüŋ Ģassānıdur
47. Cān-fezā bir ravżada gülşen görüp ˘ārif ŝanur
Şāh-ı ˘ālem meclisinde bendenüŋ dìvānıdur
48. Şevķden alup ķarārın étdüren eflāke raķŝ
 Bezm-i derd ü ġamda anuŋ sūzınuŋ elģānıdur
49. Bu kemìneŋden žuhūr éden feżāyil ser-be-ser
 Sen şehüŋ lušf-ı ˘amìm ü fażl-ı bì-pāyānıdur
50. Lāle vü reyģān ü sünbül her ne bitse ĥākden
 Cümle bārān-ı bahāruŋ fażla-i iģsānıdur
51. Ni˘met-i cūdüŋle bulmışdur çün evvelden vücūd
 Daĥi yigrek mažher olsa lušfuŋa erzānìdür
52. Néçe kim ŝaģn-ı gülistānuŋ muķavves şāĥlar
 Šāķ-ı mìnā-rengi vü gül şemse-i eyvānıdur
53. Olsun eyvān-ı refì˘ ü ķaŝr-ı ˘ālì-ķadrüŋüŋ
 Kemterìn šāķı felek kim devlet ābādānıdur
54. Źāt-ı pāküŋ yā mücessem ˘aķldur yā nūr-ı maģż
Ģaķ anı pāyende šutsun kim cihānuŋ cānıdur     Tacizade Cafer Çelebi Şiirleri

***

Mefā˘ìlün Mefā˘ìlün Fe˘ūlün
 
1. Uyandı yine envāruŋ çerāġı
 Cihānuŋ rūşen oldı bāġ u rāġı
2. Döşendi yér yüzinüŋ ferş-i sebzi
Ķuruldı šaġlaruŋ rengìn otaġı
3. Açıldı lāle-veş nevrūz kūhı
Ķuşatdı ter benefşe ŝol u ŝaġı
4. Pür étdi jāle lü’lü’ birle bāġı
 Šonatdı la˘l-i terden lāle šaġı
5. Ŝabā açdı meger dükkān-ı ˘aššār
 Güzel ĥōş ķoķular šutdı demāġı
6. Ŝaru çiçek midür bu gök çemende
 Ya yılduz ˘aksi mi ya zer oraġı
7. Ya ŝaģrā baģr-i nūr oldı ser-ā-ser
 Ya gökden yaķdı yér yér yér çerāġı
8. Yaraķladı hezārān ķanlu peykān
 Yine bülbüller içün gül budaġı
9. İŋildüsine her zurzūr-ı zārüŋ
 Nebāt-ı murġzār urmış ķulaġı
10. Görüp gül şem˘ini ĥār içre her dem
 Erür bülbüllerüŋ yüregi yaġı
11. Ayaġ üzre šurup bezm-i çemende
 Eline nerges ald’altun ayaġı
12. Ŝabā yārüŋ lebin źikr étdi beŋzer
Ŝulandı ġoncenüŋ nāzük šudaġı
13. Ķara zülfi gibi sünbül nigāruŋ
 Göŋül ķuşlarına ķurdı duzaġı
14. Çemen ģūrìleri daĥi göŋül hāy
 Güzeller gibi hep yaġmacı yaġı
15. Aķar ŝular gibi çaġlar geçer çaġ
Ġanìmet gör béş on gün gel bu çaġı
16. Fenā cāmın içem déyü gör āĥir
 Açılmaz nergesüŋ gözi ķapaġı
17. Dil-i ġonce niçün ĥūn oldı fikr ét
 Nedendür lālenüŋ baġrında daġı
18. Gel āzād ol ķul olma māl ü mülke
 Bıraķ elden ayaķdan bend ü baġı
19. Ķanı ol pādişehler kim cihānda
 Sürerlerdi yéd’iķlìme yasaġı
20. Ķanı ol ģikmet ile dirilenler
 Birinüŋ var mı göre şimdi ŝaġı
21. Gider elden çün āĥir kār-bāruŋ
 Ir arķaŋdan yüki ķaldur ayaġı
22. Temāşā ét ki Ģaķ emriyle ĥalķa
 Ne defterler açupdur dehr bāġı
23. Ķulaġı šut bu gün źikr-i šuyūra
 Unut efsāne-i dehri ķo lāġı
24. Bahārın ˘ömrüŋ éy MEDĢÌ geçürdüŋ
 Delü göŋlüŋ velì yine bayağı      Medhî ( 15. Yy. )

***

Hoşâ mübarek ü mesud ruz-i ferruh-dem
Zihi küşade ve dil-keş zamane-i hurrem
Bu ruz odur ki revadır makam-i hizmetde
Siphr-i pîr-i kuhlen-salin ola kameti ham
Bu ruz odur ki sabahında sad safa muzmer
Bu ruz odur ki mesasında bin ferah müdgam
Bu ruz odur ki sezadır olsa bir demine
Feda zamane-i sad Baykara vü müdde-i Cem
Bu ruz odur ki bu salin içinde rifatle
Bakılsa şöyle numayan durur misal-i âlem
Bu ruz odur ki anı takvim-i asman içre
Nişanlandı yine Bicis alıp eline kalem
Bu ruz odur ki yazıp namını flek ikbal
Dü nokta-veş kodu kaf üzre Ferkadana hem
Bu ruz odur ki onun sebhu talât-i canan
Şebi o talât-i zibada zülf-i ham
Bu ruz odur ki revadır anı müsahib-i çarh
Celâle medbe-i tarih edip kıla mu’lem
Bu ruz odur ki bu sal içre sadr-i zi-şana
Keremle eyledi teşrif Asaf-ı âzam             Nedim 

***

Mef˘ūlü Fā˘ilātü Mefā˘ìlü Fā˘ilün
 
1. Çün ĥurrem étdi ˘ālemi nevrūz-ı muģterem
 Dilde hevā-yı bāde gerek elde cām-ı Cem
2. Şol mey ki źevķ-ı şevķına düzdi nesìm-i ŝubģ
 Nesrìni cām ü lāleyi sāġer güli ŝanem
3. Açdı semen niķābını biŋ nāz ile nesìm
 Düzdi çemen bisāšını yüz lušf ile nesem
4. Ebr-i bahār gösterüp i˘cāz-ı ˘Ìsevì
 Rūģ érdi cümle nāmìye olmış iken ˘adem
5. Mecmū˘a-i lešāyif olup sebzezār-ı bāġ
 Her cūy cedvel oldı vü her sebze bir raķam
6. Dilber gözine beŋzedi nerges bi-˘aynihi
 Cānān yüzini oĥşadı nesrìn ü lāle hem
7. Bu vech-i aģsen ile gülüŋ cilvesin görüp
 Bülbül fiġāne geldi šutup ˘andelîbi dem
8. Beŋzer ˘arūs ķıldı benātın nebāt kim
 Her murġ sāz éder kimi zìr ü kimisi bem
9. Dildār ķaddi şevķına her serv raķŝ édüp
Ķarŝar elin çenār ü şükūfe ŝaçar direm
10. Ol ĥurdeler ki ġonce lebinde nihān idi
 Gül ŝoģbetinde geldi niśār étdi lā-cerem
11. Bir cür˘a ŝundı ĥāke meger sāġer-i hevā
 Kim keşf étdi sırrını her źerre açdı fem
12. Bir dem ki zìb ü ferrine taģsìn éder Na˘ìm
 Bir dem ki lušf-ı šab˘ına Firdevs dér ne˘am
13. Bir serv-ķadd ü sìm-ten ü gül-˘iźār ile
 Cām almayan eline bu demde ola na˘am
14. Gül yüzlüler hevāsına cām-ı mey içmege
˘Ārif gerek ki fürŝati fevt étmeye bu dem
15. Dil-teng olursa ġonce gülistānda šaŋ degül
 Nāzük mizācdur çekemez ĥārdan elem
16. Tìġ-i ĥilāf çekdügi gül ŝoģbetinde bìd
 Budur sebeb ki ĥarc içün avcında yoķ direm
17. Gül gibi güldi ŝūret-i ˘ālem bahār ile
 Ol kim bu dem ķan aġlaya bir ebr bir benem
18. Bes baģr-i fikre šaldum u dédüm żamìre ben
 Bir eş ki gelmeye baŋa andan nedem nidem
19. Dir medģ ķıl şu źātı ki ĥulķı kitābınuŋ
 Ol k’irgirür celāli felek farķına ķadem
20. Sulšān Muģammed ol şeh-i ġāzì k’işiginüŋ
 Her ĥāki kān-ı lušf-durur ma˘den-i himem
21. Éy devletüŋ evinde śevābit ģaŝāt-ı rükn
 V’éy rif˘atüŋ derinde kevākib ģaşem ĥadem
22. Šab˘üŋ seĥāsı baģrinedür nüh felek ģabāb
 Cūdüŋ hevāsı ebrinedür yédi yem nem
23. Aģkām-ı emr ü nehyüŋe şākir sipihr ü mihr
 Da˘vā-yı ˘ilm ü fażlüŋe şāhid ˘Areb ˘Acem
24. Ġarķ oldı baģr-i cūdüŋ ile māye-i niyāz
 Šayy oldı dest-i ˘adlüŋ ile nāme-i sitem
25. Hem vüs˘at-i żamìrüŋi deryā ķılur meśel
 Hem füsģat-i cenābüŋe gerdūn éder ķasem
26. Resm édicek miśālüŋi taķdìr-i Lem-yezel
 Levģ-i ķaderde yazdı bu taŝvìr ile ķalem
27. Devlet başuŋda tāc boyuŋda seĥā libās
 Boynuŋda ˘aķl šavķ bilüŋde kemer kerem
28. Ķadrüŋ ķatında noķšaya beŋzer bisāš-ı çerĥ
 Cūdüŋ yanında ķašreye beŋzer basìš-i yem
29. Aŝģāb-ı fażla oldı šapuŋ ķıble-i ereb
 Erbāb-ı ˘ilme oldı ķapuŋ Ka˘be vü Ģarem
30. Firdevs ĥānı cūduŋa olmaz müsāvì kim
Ĥān-ı na˘ìm eĥaŝdur u cūd-ı kerìm e˘am
31. Püşt-i sipihre yük ķodı gerdūn-ı rif˘atüŋ
 Andan-durur ki érdi felek ķāmetine ĥam
32. Hem ķāmet-i bülendüŋe cūd ü seĥā ķabā
 Hem devletüŋ ķabāsına lušf ü kerem ˘alem
33. Éy mažher-i se˘ādet ü v’éy manžer-i İlāh
 Éy merci˘-i efāżıl u v’éy melce˘-i ümem
34. Gūş eyle ˘arż-ı ģālümi ķıl bir nažer baŋa
 Šāli˘-durur çün ekme vü baĥtum-durur aŝam
35. Her şeb dilümde āteş ü her ŝubģ elümde bād
 Her gün başumda šopraķ u her dem gözümde nem
36. Dad almadum cihāndan u çekdüm hezār cevr
 Nūş érmedi felekden ü içdüm hezār sem
37. Ben nažm-ı ģālümi saŋa tefvìż eyledüm
 Çünkim zemāne žālim ü çerĥ oldı müttehem
38. Fetģ eyle göŋlümüŋ evini ref˘ ü naŝb ile
 Kim kesr oldı cān ile dil ġam olalı żamm
39. Düşer mi sen kerìme ki ĥulķuŋ ˘amìm iken
Ķapuŋda LUŠFÌ ķahruŋ ile ola ke’l-˘adem
40. Vācib budur ki gün gibi meşhūr-ı dehr ola
 Mihrüŋde ŝıdķ ile çün ura ŝubģ gibi dem
41. Sözüm nigār zülfi gibi bì-şümār idi
 Lìkin bu lafž ile dilerem iĥtiŝār idem
42. K’éy nev-bahār-ı lušf beni bì-nevā ķoma
 V’éy āfitāb-ı mülk başumdan gider žulem
43. İyyāke nesta˘ìn ü iyyāke nertecì
 Yā ma˘dene’l-feżāyil ü yā menba˘a’l-kerem
44. Dünyāya néçe kim gele bu lušf ile bahār
˘Ālemde néçe kim ola nevrūz muģterem
45. Gül sen hemìşe gül gibi kim ola düşmenüŋ
 Her dem benefşe bigi ser-efkende vü dijem
46. Olsun hemìşe baĥt ü se˘ādetde šapuŋa
İķbāl-i yār ü baĥt ķarìn ü cihān ģaşem
47. Hem mihr-i rif˘atüŋ yüzine ķonmasun ġubār
 Hem berg-i ŝoģbetüŋ güline érmesün elem       Lutfî ( 15. yy - Molla- Sarı veya Deli Lutfi) 

***

Fā˘ilātün Fā˘ilātün Fā˘ilātün Fā˘ilün

1. Rūz-ı nevrūz érdi zeyn oldı bahār ile cihān
 Maķdeminden oldı ˘ālem reşk-i gülzār-ı cinān
2. Nefĥ-i rūģ étdi meger ecsāda enfās-ı nesìm
 Yā cihāne vérdi zìb ü fer bihişt-i cāvidān
3. Lušf-ı enfās-ı ŝabā mı yā nesìm-i rūģ-baĥş
 Kim vérür emvāt-ı ĥākìye dem-ā-dem būy-ı cān
4. Siģr édüp bozdı šılısmını şitānuŋ nev-bahār
 Yir yüzine varın ižhār étdi her genc-i nihān
5. Ĥākden baş ķaldurup cān buldı emvāt-ı nebāt
 Münkire bildürdi ģaşr aģvālini Ģaķ bì-gümān
6. Ĥurdeler geçmiş çemende yine naķķāş-ı bahār
Ŝan nigāristān-ı Çìn oldı ģarìm-i gülsitān
7. Ravża-i bāġ-ı İrem mi dehr yā gülzār-ı ķuds
 K’anda ne ĥavf-i zemistān var ne bìm-i mihr-i cān
8. Ķurdı evreng-i çemende mihter-i bād-ı ŝabā
 Ebrden şāh-ı reyāģìn üzre müşgìn sāyebān
9. Vār ise gülşende dükkān açdı ˘aššār-ı ŝabā
 Kim mu˘aššerdür revāyiģden meşām-ı būstān
10. Dürlü reng ile müzeyyen oldı ešfāl-i çemen
 Gel ˘arūs-ı dehri gör pìr iken oldı nev-cevān
11. Ġonceler ķıldı tebessüm serv uġındı güldi gül
 Bilmezem bülbüllere noldı k’ider āh ü fiġān
12. Bezm-i gülde bülbüle cevr ile ķan yutdurmasa
 Lālenüŋ yüzine urmazdı şerāb-ı erġavān
13. Šıfl-i mekteb gibi baş egmiş benefşe bāġda
 Zülf-i dilber vaŝfını beŋzer éder dāyim revān
14. Bāde-i ĥamrāyile geldi şaķāyıķ gülşene
 Bildi kim irer bahār-ı ˘ömrine dehrüŋ ĥazān
15. Āsümāne döndi ezhār ile yér yér sebzezār
 Nerges ü nesrìn nücūm āb-ı revāndur Kehkeşān
16. Nerges-i sìmìn-beden almış ele zerrìn-ķadeģ
Ġālibā iltür çemen şāhına anı armaġān
17. Ĥār zaĥmından ķaçurup dāyesi gül šıflınuŋ
Ġoncelerden baġlamışdur boynına ˘ıķdü’l-lisān
18. Görinen ķavs-i ķuzeĥ ŝanmaŋ ģarìm-i bāġdan
 Çerĥ mir˘ātına düşmiş ˘aks-i mìr-i ˘āşıķān
19. Sebzezār-ı dehrde nerges degüldür görinen
˘Aks-i encümdür çemen āyinesind’olmış ˘ıyān
20. Sūseni gör çin seģer çìnì ˘alemler ķaldurup
 Tìġ elinde gūyiyā Çìnden gelür bir pehlevān
21. Yoĥsa bir bıŋār-ı ezraķ-pìrehen mi sebz-pūş
 Gök kebūterdür ya ĥod şāĥ üzre šutmışdur mekān
22. Nerges-i sìmìn-beden yaķmaġa şem˘in lālenüŋ
 Bezm-i gülzāre getürmiş néçe zerrìn şem˘dān
23. Başdan ayaġa zebān olup çemende yāsemen
İtmege vaŝfın semen-sìmālaruŋ açmış dehān
24. Bir ŝaçı sünbül yüzi gül ĥūba döndi ŝaģn-ı bāġ
İstemez yavuz yél esdügin içinde bāġbān
25. Bezm-i gülşende seģer bülbül ser-āġāz eyleyüp
 Oķudı bu şi˘ri kim dillerde ola dāstān
26. Gül yüzüŋ gülzār-ı cennet midür éy serv-i revān
 Verd-i ĥaššuŋ verdi yā Firdevs bāġından nişān
27. Aķdı göŋlüm ŝu gibi sen serv-i dil-cūdan yaŋa
 Cān daĥi ayaġuŋa yüz sürmege oldı revān
28. Gül yüzüŋsüz gülşen-i cennet cehennemdür baŋa
 Bülbüle gülzārsuz zindān olur bāġ-ı cinān
29. Naķd-i cān vérüp metā˘-ı vaŝlüŋe érmez elüm
 Eyledüm bāzār-ı ˘ışķuŋda taŝavvurdan ziyān
30. Ġam yémez ˘ışķuŋda miģnet oķlarından ehl-i ˘ışķ
 Šaŋ mı éy gül bülbüle olsa dikenden āşiyān
31. Ravża-i ˘ışķuŋda érmezse nesìm-i vuŝletüŋ
 Od olur sensüz Ĥalìlüm baŋa gülzār-ı cihān
32. Ķırduŋ éy şìrìn-dehen ŝāģib-meźāķı cevr ile
 Saŋa dirlerse sezādur ĥusrev-i ŝāģib-ķırān
33. Néçe bir dil almaġa eyler gözüŋ ġamzeŋ kemìn
 Néçe bir cān ķaŝdına ebrūlaruŋ ķurar kemān
34. Žulm-i bìdāduŋ elinden kime feryād édeyin
İlticā étdüm aŋa k’oldur penāh-ı ins ü cān
35. Ŝāģib-i ŝadr-ı vezāret sālik-i rāh-ı Ĥalìl
 Ya˘ni İbrāhìm Paşa āsef-i devr-i zemān
36. Mašla˘-ı mihr-i ˘adālet menba˘-ı cūd ü seĥā
 Zübde-i ĥalķ-ı cihān maķbūl-i şāh-ı kām-rān
37. Kām-kār ü kām-baĥş ü kār-fermā kām-bìn
Ŝaf-der ü leşker-şiken düşmen-küş ü kişver-sitān
38. Rām olupdur emrine baĥt-ı cüvān ü ˘aķl-ı pìr
 Bende-i fermān-beri olmış-durur pìr ü cüvān
39. ˘Adlidür žulm ü sitem Ye˘cücine sedd-i sedìd
Āsitān-ı devletidür ˘āleme dārü’l-emān
40. İntižāmına cihānuŋ re˘yi olmışdur żamìn
İntifā˘ına zemānuŋ ˘adli olmışdur żamān
41. Cān vérür ģükm-i revān-baĥşuŋ vücūd-ı ˘āleme
 Éy vücūd-ı nāzenìnüŋ memleket cismine cān
42. Ol hümā-yı evc-i rif˘atsin ki ķaŝruŋ üstine
 Bir hevāyì gök kebūter gibi döner āsümān
43. Mihr ü meh ĥuddām-ı encüm-iģtişāmüŋ rūz ü şeb
Āsitānuŋda biri derbān birisi pāsbān
44. Bezm-i ķadrüŋ şem˘idür māh-ı şeb-efrūz-ı felek
 Devletüŋ ķaŝrında zerrìn šopdur mihr-i cihān
45. Çāşnìgìr-i ta˘āmüŋ ģūr ü ġılmān ü melek
 Mirviģa-gerdān-ı bezmüŋ zümre-i kerrūbiyān
46. Bāġ-ı dehre véreli ˘adlüŋ bahārı i˘tidāl
 Anda ne ĥavf-i şitā var ne şitāb-ı mihr-i cān
47. Görinen yér yér riyāż-ı dehrde nerges degül
 Mihr-i lušfuŋ olmış evrāķ-ı çemende zer-fişān
48. ˘Aks-i şemşìrüŋle nola nūr ü fer bulsa semā
 Gülşene neşv ü nemā vérür belì āb-ı revān
49. Rūz-ı rezm içinde kim tìġüŋ niyāmından çıķar
Ŝan dehān-ı ejdehādan ŝaçılur nār ü düĥān
50. Āstìn-i ˘adli silkelden yed-i inŝāf ile
 Pākdür gerd-i sitemden dāmen-i āĥir zemān
51. Cennet olurdı yéri a˘rāfa baŝmazdı ķadem
 Gitse bu ˘adl ile dünyādan eger Nūşinrevān
52. Tìġ-i lušfuŋ yér yüzin šutdı ser-ā-ser cūd ile
Ķanı meydān-ı keremde saŋa beŋzer pehlevān
53. Bilmezem vaŝf-ı bedì˘üŋ kim beyān eyler ˘aceb
 Kim anuŋ şerģinde ˘āciz ˘aķl ķāŝırdur lisān
54. Cem˘ édüp vaŝfüŋ bahāristānınuŋ ezhārını
 Bir gülistān baġladum k’irmez aŋa bād-ı ĥazān
55. Sensin ol kān-ı sa˘adet kim éşigüŋ yaŝdanup
 Néçe benüm gibi ķullar oldı mìr-i kām-rān
56. Benven ol ġavvāŝ-ı baģr-i˘ilm ü fażl ü ma˘rifet
 Kim olupdur ķulzüm-i medhüŋde šab˘üm dür-fişān
57. Āŝefā gün gibi rūşendür benüm ģālüm saŋa
 Baŋa žulm ü ġadr éden baĥt-ı siyāhumdur hemān
58. Oķ gibi šoġrulıġum hep bildi tìr-endāz olan
 Çerĥ-i kec-rev yā niçün ķıldı elif ķaddüm kemān
59. Néçe bir olam meźellet šopraġında pāy-māl
 Dehr-i dūn-perver elinden néçe bir āh ü fiġān
60. Néçe yıldur yél gibi ķıldum cihānı cüst-ü-cū
 Šāli˘ümde bulmadum aŝlā se˘ādetden nişān
61. ˘Āķıbet yüz sürüyi geldüm éşigüŋ tozına
 Kim vücūdüŋden baŋa éde se˘ādet iķtirān
62. Umaram şimden girü manžūr ola ehl-i kemāl
Ķande var źātuŋ gibi dāniş-güzìn ü nüktedān
63. Ġarķ olurdı baģr-i źilletde vücūdüm zevraķı
 Cāme-i himmet ümìdi olmasaydı bād-bān
64. Çün SÜCŪDÌ bendeŋ édindi éşigüŋ secdegāh
 Umaram kim fetģ-i bāb éde Ĥudā-yı Müste˘ān
65. İĥtiŝār eyle dilā şimden girü taŝdì˘i ķo
Ģālüŋe çün vāķıf oldı āŝef-i ĥusrev-nişān
66. Şerģ olınmaz çün senüŋ ģālüŋ gibi vaŝfı anuŋ
Ŝıdķ ile eyle du˘ā-yı devletin vird-i zebān
67. Būstānında sipihrüŋ olduġınca nev-bahār
Ģaķ bahār-ı ˘ömrüŋe érgürmesün hergiz ĥazān   Sücûdî ( 16. yy Kalkandelenli)