DER-FAHRİYYE BE-İŞÂRET-İ VÂKI`A-İ BÎ-MİSL


Esa
5.10.2017
 
DER-FAHRİYYE BE-İŞÂRET-İ VÂKI`A-İ BÎ-MİSL
 
Fe`ilâtün Mefâ`ilün Fe`ilün
 
1 Zerrede âfitâbdur tab`um
Katrede bahr-ı nâbdur tab`um
2 Nüh felek zımn-ı reşhasında girev
Bir mu`allak habâbdur tab`um
3 Bâde keyfiyyetin ziyâd itmez
Ezelî neşve-yâbdur tab`um
4 Çeşme-sâr-ı hayâta peyveste
Ebedî feyz-yâbdur tab`um
5 Mest ider katresi cihânı tamâm
Hum-ı Kevser-şarâbdur tab`um
6 Vâkıf-ı sırr-ı `ilm-i hlâh vü hillâh
`Arif-i behre-yâbdur tab`um
7 Ber-ter idrâk-ı lafz u ma`nâdan
Bir bilinmez kitâbdur tab`um
8 Menba`-ı `ilm ü mahzen-i `irfân
Pîr-i hikmet-nisâbdur tab`um
9 Zîr-i her-gamzesinde küşte cihân
8
Şâhid-i bî-nikâbdur tab`um
10 Kâtı`-ı rişte-i nizâ`-ı sivâ
Tîg-i faslu`l-hitâbdur tab`um
11 Hikem-âmûz-ı dâniş-i Bû `Alî
Tıfl-ı ümmü`l-kitâbdur tab`um
12 Şehsüvârân-ı râh-ı ma`nâda
Fark-ı sûde-rikâbdur tab`um
13 Atılur dîv-sîretân üzre
Tîr-i necm-i şihâbdur tab`um
14 Hep sürâğ-ı zamâyire derrâk
Nutk-ı hâzır-cevâbdur tab`um
15 Ne hirâs-ı günâhı fikr eyler
Ne esîr-i sevâbdur tab`um
16 Bî-mey ü câm-ı bezm-gâh-ı fenâ
Rind-i mest-i harâbdur tab`um
17 Ma`nîde nûr-ı bî-nihâyetdür
Sûreten hûn-ı nâbdur tab`um
18 `Aks-i icmâli `âlem-i imkân
Hâric-i nüh-kıbâbdur tab`um
19 Gösterür cilve-i cihân-ârâ
Misl-i âyîne-tâbdur tab`um
20 Reşk-fermâ-yı genchâ-yı şehân
Kân-ı la`l-i müzâbdur tab`um
21 Hased-âverd-i gûşvâr-ı mehân
Sadef-i dürr-i nâbdur tab`um
22 Çeşm-i ikrâra bâğ-ı huld-i berîn
Misk ü `anber-türâbdur tab`um
23 Tarf-ı inkâr-ı münkire ammâ
Turfe deşt-i serâbdur tab`um
24 Resm-i dîvânı tarz-ı nâdîde
Şeh-i `âlî-cenâbdur tab`um
25 Nice şeh tâc-dâr-ı kerremnâ
Husrev-i kâm-yâbdur tab`um
9
26 Nice şeh feyz-i hükm-i `adlinden
Dem-i ihyâ-`itâbdur tab`um
27 Nice şeh taht-ı kişver-i hlâhda
Nakş-ı hillâh-siyâbdur tab`um
28 Bâtınen âfitâb-ı bî-mikdâr
Zâhiren mâh-tâbdur tab`um
29 Dil-i gam-hâre çok mı bu rütbe
Dîde-i seyr-i hâbdur tab`um
30 Seyr-i hâbî ki `adli yok anuñ
Sıdka bî-irtiyâbdur tab`um
31 Seyr-i hâbî ki yok temessül aña
Rü`yetine me`âbdur tab`um
32 Lutf-ı bî-minnetinden ol seyrüñ
Cilve-gâh-ı savâbdur tab`um
33 Kereminden o seyr-i bî-mislüñ
Feyz-bahşâ sehâbdur tab`um
34 O ne seyr ola dir iseñ k`andan
Fâyiz ü müstetâbdur tab`um
35 Dest-i sâkî-i bezm-i kudsîden
Cür`a-nûş-ı hitâbdur tab`um
36 La`l-i nûşîn-i fahr-i `âlemden
Nûş-kerde lü`âbdur tab`um
37 O `atânuñ hücûm-ı zevkinden
Mâye-i ıztırâbdur tab`um
38 O vefânuñ sürûr-ı şevkinden
Vakt-i şeybetde şâbdur tab`um
39 O sürûruñ safâ-yı lutfından
Ebedî zevk-yâbdur tab`um
40 O safâdan hemîşe sînemde
Reşk-i mest-i şarâbdur tab`um
41 Gerçi hîç-enderîn-i hîç-der-hîç
Misl-i mahsûs-ı hâbdur tab`um
10
42 Lîk `aks-i bekâ-yı hestîden
`Âlem-i bî-hisâbdur tab`um
43 Nâmı Ahmedle iftihâr-nümâ
Nâmî-i şöhre-yâbdur tab`um
 
Yard. Doç. Dr. Ahmet YENİKALE  AHMET NÂMÎ  DÎVÂNI VE İNCELEMESİ, T. C. KÜLTÜR VE TURİZM BAKANLIĞI KÜTÜPHANELER VE YAYIMLAR GENEL MÜDÜRLÜĞÜ 3194 KÜLTÜR ESERLERİ
 
Bu içeriğe henüz katkı yapılmamış

Sitedeki yazıların tüm hakları ve sorumluluğu yazı sahiplerine aittir. Yazıların izin alınmadan kopyalanması ve kullanılması 5846 sayılı Fikir ve Sanat Eserleri Yasasına göre suçtur. Aksi davranışlara karşın yasal işlemlere başvurulacaktır.


Henüz yorum yapılmamış