Visâliñ ‘îdiniñ cân ile kan hayrânıyız cânâ


Esa
4.04.2016
 
 
Gazel
[4]
 [mefâ’îlün / mefâ’îlün / mefâ’îlün / mefâ’îlün]
 
 1 Visâliñ ‘îdiniñ cân ile kan hayrânıyız cânâ
 Bıçakdan geçme ol hürrem-demiñ kurbânıyız cânâ
 
 2 Lebiñ ol kıt’a-i yâkûtdur kim seyr edip hattın
 Debîr-i meşk-i ta’lîm-i hat-ı reyhânıyız cânâ
 
 3 Bu tugrâ gibi kaşlar var iken menşûr-ı hüsnüñde
 Şeh-i nâz u ‘itâbıñ bende-i fermânıyız cânâ
 
 4 Agırlarsañ bizi seng-i melâmetle agırlarsın
 Sarây-ı hüsnüñüñ pek tafralı mihmânıyız cânâ
 
 5 Meded hıfz eyle zîr-i dâmeniñde sarsar-ı gamdan
 Cihânıñ nûr-ı şem’-i meclis-i ‘irfânıyız cânâ
 
 6 Anıñçün çâr-mevc-i ıztırâba düşmüşüz böyle
 Güher var sînemizde ma’rifet ‘ummânıyız cânâ
 
 7 Kalırsa adımız bâkî kalır Vehbî deyü yohsa
 Fenâ dünyâda Bâkî gibi biz de fânîyiz cânâ
 
Yrd. Doç. Dr. Ahmet YENİKALE, SÜNBÜL-ZÂDE VEHBÎ DÎVÂNI, Kahramanmaraş 2012
 
 
 
Bu içeriğe henüz katkı yapılmamış

Sitedeki yazıların tüm hakları ve sorumluluğu yazı sahiplerine aittir. Yazıların izin alınmadan kopyalanması ve kullanılması 5846 sayılı Fikir ve Sanat Eserleri Yasasına göre suçtur. Aksi davranışlara karşın yasal işlemlere başvurulacaktır.


Henüz yorum yapılmamış