Yâr hem-bezm olup agyâr ile peymâne çeker


Esa
4.04.2016
 
Gazel
 
[61]
 [fe’ilâtün / fe’ilâtün / fe’ilâtün / fe’ilün]
 
 1 Yâr hem-bezm olup agyâr ile peymâne çeker
 ‘Âşık-ı zâr ‘abes na’ra-i mestâne çeker
 
 2 Dâmenin dest-i temennâya düşürmez yohsa
 Çâk eder her birisi şevk ile bir yana çeker
 
 3 ‘Aks-i serv-i kadini görmek içün cûlarda
 Cezbe-i şevk beni sû-yı gülistâna çeker
 
 4 Perde-i şermi yakar şu’le-i ‘aşk-ı ser-keş
 Şem’i meclisde hemân sîneye pervâne çeker
 
 5 Sen hemân kadriñi sencîde-i ragbet edegör
 Yûsuf olsañ da zamâne seni mîzâna çeker
 
 6 Sayd-ı mürg-i emele halka-i dâm etmişler
 Zâhirâ ehl-i riyâ sübha-i sad-dâne çeker
 
 7 Kad-i ham-geşte ile hâle gibi Vehbî-i pîr
 Her şeb ol mâh-ruhu sîne-i ‘uryâna çeker
 
Yrd. Doç. Dr. Ahmet YENİKALE, SÜNBÜL-ZÂDE VEHBÎ DÎVÂNI, Kahramanmaraş 2012
 
 
 
Bu içeriğe henüz katkı yapılmamış

Sitedeki yazıların tüm hakları ve sorumluluğu yazı sahiplerine aittir. Yazıların izin alınmadan kopyalanması ve kullanılması 5846 sayılı Fikir ve Sanat Eserleri Yasasına göre suçtur. Aksi davranışlara karşın yasal işlemlere başvurulacaktır.


Henüz yorum yapılmamış