Aceb bu kâmeti zîbâ nihâl-i bâg-ı cennet mi

Mefâ’îlün/ Mefâ’îlün/ Mefâ’îlün/ Mefâ’îlün

 Hezec: . - - - / . - - - /. - - - / . - - -

 

1 ‘Aceb bu kâmeti zîbâ nihâl-i bâg-ı cennet mi

 Hırâm-ı nâz ile reftâr iden ol serv-i kâmet mi

2 Görinmezsin amân ey nâzenînüm hayli demlerdür

 Beni bu derd ü mihnetle helâk itmek mürüvvet mi

3 Güzergâhunda beklerdüm seni görmek içün cânâ

 Yolunda hâk-sâr olmak o da bir resm-i ‘âdet mi

4 Olur hûn-âb-ı eşkümle elümde sâgarum pür-hûn

 Dü çeşmümden akan kanum şarâb-ı eşk-i hasret mi

5 Nedür bu âh vâh u nâle vü feryâd-ı bî-câlar

 Yine derd-i derûndan Yâverâ halka şikâyet mi

 

Dr. Kaplan ÜSTÜNER, ENDERUNLU HASAN YÂVER DİVAN [İnceleme-Metin-Çeviri-Dizin], https://ekitap.kulturturizm.gov.tr/Eklenti/10608,enderunlu-hasan-yaver-divanipdf.pdf?0