Açıl ey gül dehân-ı gonçeye nutk-ı zebân göster

 

[73]

Mefâ`îlün Mefâ`îlün Mefâ`îlün Mefâ`îlün

 

1 Açıl ey gül dehân-ı gonçeye nutk-ı zebân göster

 Hamûş it bülbüli lutf-ı edâ hüsn-i beyân göster

2 Ser-i kûy-ı cihân-âsâña nâz ile çıkup gâhî

 Hırâmân ol cihâna fitne-i âhir zamân göster

3 Sehâb-ı turrañı ref` it cebîn-i tâb-nâküñden

 Bilinsin gurre-i garrâ hilâl-i ebruvân göster

4 Vefâ-yı va`de-i lutf itmez iseñ de dil-i zâra

 Ferâmûş itme bârî iltifât-ı imtinân göster

5 Girîbân-ı cihânı nekhet-i nagz ile leb-rîz it

 Yine tarf-ı külehden kâkül-i `anber-feşân göster

6 Ufukda mâh-ı bedr-i hâleye mâhiyyetin bildür

Kenâr-ı mâha gel zerrîn kemerle mû-miyân göster

7 `Adû inkâr iderse tab`-ı sihr-endîşeñi Nâmî

 Sevâd-ı hâme-i mu`ciz-beyân-ı dil-sitân göster

 

 

Yard. Doç. Dr. Ahmet YENİKALE  AHMET NÂMÎ  DÎVÂNI VE İNCELEMESİ, T. C. KÜLTÜR VE TURİZM BAKANLIĞI KÜTÜPHANELER VE YAYIMLAR GENEL MÜDÜRLÜĞÜ 3194 KÜLTÜR ESERLERİ