Acıyu acıyu baña yaralar kan aglasun

 

Fâ‘ilâtün Fâ‘ilâtün Fâ‘ilâtün Fâ‘ilün(1)

 

1. Acıyu acıyu baña yaralar kan aglasun

 Döne döne üstüme gerdûn-ı gerdân aglasun

 

2. Başumuñ üstinde çözsün saçlarını dûd-ı âh

İñileşsüñ nâleler bu çeşm-i giryân aglasun

 

3. Çihresinde eşk-i dür-bârı dizilsün jâle-vâr

 Ruhlaruñdan ayru baña verd-i handân aglasun

 

4. İşidicek la‘l-i gevher-bâruña hat geldügin

 Bir karañluk yire girsün âb-ı hayvân aglasun

 

5. Zülf-i müşgînüñ hevâsı hâk idüpdür Emrîyi

 Kara geysün sünbül-i bâg ebr-i nîsân aglasun

 

Prof. Dr. Mehmet A. Yekta SARAÇ, EMRÎ DÎVÂNI, T. C. KÜLTÜR VE TURİZM BAKANLIĞI KÜTÜPHANELER VE YAYIMLAR GENEL MÜDÜRLÜĞÜ 3144 KÜLTÜR ESERLERİ 427