Âherin râhatını iste ki râhat bulasın

 

158

 

 (Feilâtün Feilâtün Feilâtün Feilün)

 

 1 Âherin râhatını iste ki râhat bulasın

Vâdî-i gadre sülûk etme selâmet bulasın

 2 Ekdigin biçmedesin resm ü reh-i hâk budur

 Sen de ma-dûnuna rahm eyle ki rahmet bulasın

 3 Âşinâ eyle yed-i himmeti nîgû-kâra

 Bir işi eyleme ki sonra nedâmet bulasın

 4 Derde dermân olagör nabza göre şerbet ver

 Tavr-ı üslûb-ı hakîm üzre halâvet bulasın

 5 Eyle hûn-ı dilini bezm-i mükâfâta şarâb

 Neş’e-i vasla dimâgında liyâkat bulasın

 6 Cüst u cû eyleme şeh-râh-ı seyâhatde abes

 Bahr-ı irfânı ara dürr-i hakîkat bulasın

 7 Nev-be-nev ârız olur perteve noksân u kemâl

 Mihr-i ikbâli gözet meh gibi şöhret bulasın

 8 Haşmetâ mâl u menâsıbda merâtib arama

 Âdemiyyetde çalış pâye-i rifat bulasın

 

 

Haz.: Dr. Mehmet Arslan-İ. Hakkı Aksoyak, Haşmet Haşmet Külliyatı, T. C. KÜLTÜR VE TURİZM BAKANLIĞI KÜTÜPHANELER VE YAYIMLAR GENEL MÜDÜRLÜĞÜ 3199 KÜLTÜR ESERLERİ