Alemde bu gün sencileyin yar kimün var
15.04.2016
Âlemde bu gün sencileyin yâr kimün var
Ger var dir isen yoh dimezen var kimün var
Dildâr-ı mecâzî bulınur âşıka yüz min
Benzer sana tahkîkda dildâr kimün var
Mahbûb kamer yüzlü boyı sidre yüküşdür
Yanagları gül la‘l-i şeker-bâr kimün var
Işkun gamına eylemişem gönlümi mahzen
Bir munçılayın mehzen-i esrâr kimün var
İy nisbet iden yüzini gülzâra vü bâga
Yüzi tek anun gülşen ü gülzâr kimün va
Ayyâreleyin turrası menden gönül aldı
Benzer sana bir turra-i tarrâr kimün var
Fâş eylemişem halka ene’l-hakkı vü Hak’dan
Bir mencileyin âşık-ı berdâr kimün var
İy moncugı dürdâne sanan gevherüni bil
Tâ kim bilesen lü’lü’-i şehvâr kimün var
Gerçi yanagı matla-ı envârdur anun
Zülfi kimi bir matla-ı envâr kimün var
Tâtara saçun tozını tüccâr ile gönder
Tâ kim bileler nâfe-i Tâtâr kimün var
Cân ile cihân yâre fedâ kıldı Nesîmî
Anun kimi bir yâr-ı vefâdâr kimün var
