Anber hatın ögdüm tama`-ı hâma düşürdüm

 

Mef`ûlü mefâ`îlü mefâ`îlü fe`ûlün

 

 1 Anber hatın ögdüm tama`-ı hâma düşürdüm

 Dil mürgini kurtulmayacak dâma düşürdüm

 2 Kûyında yitirdüm dili gâyet elemüm var

 Gûyâ tolı esrâr ile bir nâme düşürdüm

 3 Gördüm ki düşer güllere gülzârda şeb-nem

 Ben gönlümi ol `ârız-ı gül-fâma düşürdüm

 4 Gül şevkine bülbüller ider nâle vü feryâd

Şûrîdeligi ben de o hengâma düşürdüm

 5 Yahyâ dili ol zülf-i girih-gîre ki virdim

 Gird-âb-ı gam u lücce-i âlâma düşürdüm

 

 

Hasan KAVRUK , ŞEYHÜLİSLAM YAHYÂ DÎVÂNI,  T. C. KÜLTÜR VE TURİZM BAKANLIĞI KÜTÜPHANELER VE YAYIMLAR GENEL MÜDÜRLÜĞÜ 3147