Andelîb-i dil ki dâyim şevk ile feryâd ider

 

[72]

Fâ`ilâtün Fâ`ilâtün Fâ`ilâtün Fâ`ilün

 

1 `Andelîb-i dil ki dâyim şevk ile feryâd ider

 Gül-nihâl-i gülşen-i üns-i visâli yâd ider

2 Virmemiş hükm-i makâm-ı `ışkı Kays-ı bî-nevâ

 Yohsa deşti bir şikeste âh gird-i bâd ider

3 Zûr-ı bâzû-yı mahabbetdür felekde kâr iden

 Sanmañuz kim Bî-sütûna tîşe yâ Ferhâd ider

4 Bezm-i `ışka şâhid-i gûş u zebân bîgânedür

 Nagme-i harf-âşinâyı müdde`î isnâd ider

5 Zâhidâ güm-kerde-rehsin bârî gezme serserî

 Gel harâbâta seni pîr-i mugân irşâd ider

6 Vuslat olsa bîm-i fürkat hecre düşse derd-i gam

 `Âşıkı devr-i felek bilmem ne dem dil-şâd ider

7 Telh-kâm olur mezâk-ı bü`l-hevesde câm-ı `ışk

 Zevk iderse Nâmî-âsâ mest-i mâder-zâd ider

 

 

Yard. Doç. Dr. Ahmet YENİKALE  AHMET NÂMÎ  DÎVÂNI VE İNCELEMESİ, T. C. KÜLTÜR VE TURİZM BAKANLIĞI KÜTÜPHANELER VE YAYIMLAR GENEL MÜDÜRLÜĞÜ 3194 KÜLTÜR ESERLERİ