‘Ârif Efendi Hazretlerinün Sadr-i Rum Oldugına Târîhdür

 

‘Ârif Efendi Hazretlerinün

 Sadr-i Rum Oldugına Târîhdür

 

 mefâ’îlün mefâ’îlün mefâ’îlün mefâ’îlün

 

 1. Fe-hamden sümme hamden ol yegâne fâzıl ü dânâ

 Yine sadr-i mu’allâya şeref-bahş-i kudûm oldı

 2. Edîb-i nükte-dân müşkil-güşâ-yi bî-müdânî kim

 Vücûd-i bî-nazîri iftihâr-i mülk-i Rum oldı

 3. ‘Aceb mi gâlib olsa dehre envâr-i fazîletle

 Bu mihr-i ‘âlem-ârâ gayrılar hem-çün nücûm oldı

 4. Dü-mısrâ’-i deri şeh-beyt-i dîvân-i sa’âdetdür

 Haremgâh-i refî’i matla’-i nûr-i ‘ulûm oldı

 5. Sabâ neşr eyleyince nükhet-i peygâm-i teşrîfin

 Gürûh-i ehl-i tab’a mâye-i def’-i gumûm oldı

 6. Şeh-i mülk-i ma’ârif mesned-ârâ-yi suhan-dânî

 Kim âfâka du’â-yi devleti de’b-i rüsûm oldı

 7. Didi târîhini Sâmî senâ-kârı meserretle

 Cenâb-i ‘Ârif-i bi'llâh müjde sadr-i Rum oldı         sene 1122

 

(Fatma Sabiha KUTLAR OĞUZ, ARPAEMÎNİ-ZÂDE MUSTAFA SÂMÎ  DİVANI https://ekitap.kulturturizm.gov.tr/Eklenti/10592,arpaeminizade-samipdf.pdf?0