‘Âşıklarıñ eglencesi ism-i zâtıñ yâ Rabbenâ

 

‘Âşıklarıñ eglencesi ism-i zâtıñ yâ Rabbenâ

 Cânlarınıñ diñlencesi zikr-i zâtıñ yâ Rabbenâ

 2 Fazlıñ kime beyân olur gizli râzı tuyan olur

 Aña katı ‘ayân olur keşf-i zâtıñ yâ Rabbenâ

 3 Ne gelmiş ne gelesidür ne olmuş ne olasıdur

 Ne bulmuş ne bulasıdur misl-i zâtıñ yâ Rabbenâ

 4 Halkıñ çogı hakkı bilmez ancalar râh arar bulmaz

 Degmelere nasîb olmaz vasl-ı zâtıñ yâ Rabbenâ

 5 Gerçek erleriñ hâlıdur gideniñ ugrar yolıdur

 Cümle ‘âleme tolıdur hüsn-i zâtıñ yâ Rabbenâ

 6 Hûr-i cinân sohbetine magrûr olma devletine

 İremezler lezzetine kurb-ı zâtıñ yâ Rabbenâ

 7 Cezb eyleseñ kime seyrden eger giçden eger irden

 Hergiz ayrılmaz nazardan resm-i zâtıñ yâ Rabbenâ

 8 Bahr-ı mugrıkdur dalınmaz bu bahra gavvâs bulınmaz

 Lâ-te‘ayyündür bilinmez künh-i zâtıñ yâ Rabbenâ

 9 Bilen sensin ‘ilme’l-yakîn gören sensin ‘ayne’l-yakîn

 Bulan sensin hakka’l-yakîn bahr-ı zâtıñ yâ Rabbenâ

 10 Seni bildüm diyen bilmez seni buldum diyen bulmaz

 Dile gelüp şerh olınmaz vasf-ı zâtıñ yâ Rabbenâ

 11 Bilmeyenler bildüm sanur bulmayanlar buldum sanur

 Görmeyenler gördüm sanur nûr-ı zâtıñ yâ Rabbenâ

12 Ger enbiyâ ger evliyâ ger asfıyâ ger etkıyâ

 Oldılar mazhar-ı zıyâ vech-i zâtıñ yâ Rabbenâ

 13 Her kimi nûruñ cezb ider ‘aşkıñ yolın turmaz güder

 Dâ’im anı ihrâk ider ‘aşk-ı zâtıñ yâ Rabbenâ

 14 Sensin ‘âlemlerden ganî ister bu cân senden seni

 Ayırmasun cân u teni künh-i zâtıñ yâ Rabbenâ

 15 Ümmî Sinân fazlıñ ile gitmek dilerler ol ile

 Sen mahrem eyledüñ hele sırr-ı zâtıñ yâ Rabbenâ

 

 

Ümmi Sinan  TÜM Şiirleri

ÜMMİ SİNAN ( ELMALILI - 17. YY ) HAYATI VE ŞAİRLİĞİ