Âyâ dil-i vîrânumı mey-hâne mi sanduŋ
16.09.2017
364
Mef‘ûlü Mefâ‘îlü Mefâ‘îlü Fe‘ûlün
1 Âyâ dil-i vîrânumı mey-hâne mi sanduŋ
Ya dîde-i pür-hûnumı peymâne mi sanduŋ
2 Ferhâd ile işidüp kıssasın ey şûh
Ahvâlümüz anuŋ gibi efsâne mi sanduŋ
3 Vîrâneyi ma‘mûreye itdi ise tercîh
Ey bî-hıred ol ‘âkılı dîvâne mi sanduŋ
4 Teklîf-i sükût itmedesün bülbül-i zâra
Bilmem ki güli şem‘ anı pervâne mi sanduŋ
5 Gamnâk olur ‘aklı kadar çün kişi zâhid
Bî-hûşları yek-sere mestâne mi sanduŋ
6 Yakduŋ sitemüŋ nârına ey şem‘-i dil-efrûz
Pervâne-i gam-hâruŋı bîgâne mi sanduŋ
7 Ey seyl-i keder ugramaduŋ hâtır-ı hasma
Âyâ dil-i SÂKIB gibi vîrâne mi sanduŋ
Kırbıyık, Mehmet. Kâtib-zâde Sâkıb Dîvânı. https://ekitap.kulturturizm.gov.tr/dosya/1-275466/h/katibzade-sakib.pdf [erişim tarihi: 01.05.2013]
