Azm ider gülzâra `âşık nev-cevânın gezdürür

Fâ`ilâtün fâ`ilâtün fâ`ilâtün fâ`ilün

 

 1 `Azm ider gülzâra `âşık nev-cevânın gezdürür

 Bir ölümli hastedür bî-çâre cânın gezdürür

 2 Aşık-ı ham-geşteden dil-dâr kim olmaz cüda

 Bir kemân-keşdür ki yanınca kemânın gezdürür

 3 Gerden-i hurşîde zencîr-i şu`â`ı bend idüp

 Pehlevân-ı çarhı gör şîr-i jiyânın gezdürür

 4 Berg-i gül bâr oldı mı anlar ki dinlensün diyü

Şeh-süvârum eşheb-i çâbük-`inânın gezdürür

 

 5 Gösterür Yahyâ ma`ârif ehline mecmû`asın

 Gûyiyâ bir bâgbândur gülsitânın gezdürür

 

Hasan KAVRUK , ŞEYHÜLİSLAM YAHYÂ DÎVÂNI,  T. C. KÜLTÜR VE TURİZM BAKANLIĞI KÜTÜPHANELER VE YAYIMLAR GENEL MÜDÜRLÜĞÜ 3147