Bâga ol nahl-i revân gelse kim itmez i`zâz

Fe`ilâtün fe`ilâtün fe`ilâtün fe`ilün

 

 1 Bâga ol nahl-i revân gelse kim itmez i`zâz

 Cümleden serv ider sâyesini pây-endâz

 2 Bir nigâh içün iderler yine dünyâ nâzın

 Dil-rubâlar ne kadar eyleseler şîveyi âz

 3 Bâ`is-i ragbet olur dil-berün istignâsı

 Nemek-i hüsndür insâf idicek şîve vü nâz

 4 Birbirinden ne `aceb hîç cudâ olmazlar

 Bilmezin âşık u ma`şûk mıdur nâz u niyâz

 5 Uzanup zülfi kadd-i yâr bülend oldukça

 Dil-i sevdâ-zede inkâra düşer dûr u dırâz

 6 Çeşm-i dil-ber nice pinhân ide mecnûnlugın

 Ana hem-sohbet iken gamze gibi bir gammâz

 7 Şeb-i hicrânı sabâha çıkaran Yahyâ'dur

Şem`ler mi duya böyle olıcak sûz u güdâz

 

 

Hasan KAVRUK , ŞEYHÜLİSLAM YAHYÂ DÎVÂNI,  T. C. KÜLTÜR VE TURİZM BAKANLIĞI KÜTÜPHANELER VE YAYIMLAR GENEL MÜDÜRLÜĞÜ 3147