Başına Efser İden Şah İşiginün Minnetin
26.02.2017Başına Efser İden Şah İşiginün Minnetin
Başına efser iden şah işiginün minnetin
Çekmeye yirden göge çarh-ı berînün minnetin
Öldügümden sonra tek irgür gubârum kûyına
Ey sabâ yüklet bana rûy-ı zemînün minnetin
‘Iyd-ı vasluna irüp birgün nisâr idem dirüm
Çekdügüm yıllarla ‘ömr-i nâzenînün minnetin
Dürr dişün vasfında görse şi’rümi kulak çeker
Kulagına asmayan dürr-i semînün minnetin
Gerd-i dergâhun umar çeşm-i emel yüz milden
Göze göstermez Sıfâhân sürmesinün minnetin
Seglerünle hem-sifâl olmış iken kapunda dil
Cân yedürse çekmeye fagfûr-ı Çînün minnetin
Âh kim her kapuya yüz süridüm yüz bulmadum
Gerçi yüz dünyâca çekdüm her birinün minnetin
Himmetün ‘Âşık bülend it dergeh-i ‘âlîye var
Mansıb içün çekme dünyâ-yı denînün minnetin
0
0
Yorum Yapmak için Kayıt Olun veya Giriş Yapın