Ben olalı ol gözleri cellâddan cüdâ

Mef‘ûlü/ Mefâ‘îlü/ Mefâ‘îlü/ Fe‘ûlün

 

Ben olalı ol gözleri cellâddan cüdâ

Olmadı dil figân ile feryâddan cüdâ

Yâra sever seni diyü durmaz geçer beni

Gitdi rakîb olmadı ifsâddan cüdâ

Göñlüm yıkıldı irmeyeli dest-i cûd-ı yâr

Zîrâ binâ harâb olur üstâddan cüdâ

Ayrılmasun yanumdan efendi seng-i gamuñ

Lâyık degül ola dil-i nâ-şâddan cüdâ

Pîr-i mugândan ayrı yolum irdi mescide

Sûfî tarîkın azıdur irşâddan cüdâ

İñler felekler öldigümi gûş idüp benüm

Kûh itse nâleler n’ola Ferhâd’dan cüdâ

Düşdüm diyâr-ı fürkate zâd oldı derd ü gam

Ravzî baña ol yâr-i perî-zâddan cüdâ

 

Dr. Yaşar AYDEMİR, RAVZÎ DİVANI, T. C. KÜLTÜR VE TURİZM BAKANLIĞI KÜTÜPHANELER VE YAYIMLAR GENEL MÜDÜRLÜĞÜ 3192 KÜLTÜR ESERLERİ ,Ankara 2009