Berây-ı Baltacı Mehmed Paşa
 
 Der-‘Avdet-i Sefer-i Moskov
 
 mefâ‘ilün fe‘ilâtün mefâ‘ilün fe‘ilün
 
 1 O müjdeler ki pey-â-pey sımâh-ı câna gelür
 Neşât u zevki ne ta‘bîr ü ne beyâna gelür
 2 Ne müjde bir güher-i şâhvâr-ı zî-kıymet
 Ne yetîmgâh-ı yeme ne dükân-ı kâna gelür
 3 Felek bu müjde-i cân-bahş içün zemîne eger
 Cihânı virmege gelse yine ziyâna gelür
 4 Bu müjdenüñ ne bilür müjdegânesi ne deger
 Cihân bahâsı degüldür o bî-bahâ ne gelür
 5 Ne müjde müjde-i sad-sâle istimâ‘ından
 Hayâtı mağza gelür mağzı üstühâna gelür
 6 Ne müjde ‘ömr-i girân-mâye-bahş-ı ‘âlemdür
 Dem-i Mesîh ile da‘vâ-yı imtihâna gelür
 7 Ne müjde âsaf-ı ‘âlem gazâ-yı ekberden
 Hezâr nusret ü devletle âsitâna gelür
 8 Semiyy-i fahr-ı rüsül sadr-ı a‘zam u gâzî
 Der-i sa‘âdet-i şâhenşeh-i zamâna gelür
 9 Ne şeh o pâdişeh-i câh-bahş-ı heft-iklîm
 Ki midhatiyle kalem lâl iken zebâna gelür
 10 Harîm-i devletini rüft u rûba sad Dârât
 Mahal bulursa edeblerle ‘âcizâne gelür
11 Cenâb-ı Hazret-i Sultân Ahmed el-Gâzî
 Ki dergehine Sikender ‘ulüvv-i şâna gelür
 12 Eyâ şehinşeh-i ‘âlem mübârek ola gazâñ
65
 Hulûsuñ oldı sebeb gayrı yok lisâna gelür
 13 Vezîr-i a‘zamuñ oldı muzaffer ü mansûr
 Du‘âñı almağa rû-mâl-i âsitâna gelür
 14 Murâduñ üzre alup nice kal‘a a‘dâdan
 Dilîr-i gâlib-i mutlak muzafferâne gelür
 15 Gelen guzât ile ol âsaf-ı zamâne midür
 Yâ hod bahâr mıdur sûy-ı gülsitâna gelür
 16 Ne bir senüñ gibi şâhenşeh-i ‘âdil-güster
 Ne bir anuñ gibi Âsaf-eser cihâna gelür
 17 Per açdı cevv-i semâ-yı cihâda ol şeh-bâz
 Şikârın aldı dönüp sûy-ı âşiyâna gelür
 18 O şîr-i lerze alup intikâmı a‘dâdan
 Hezâr heybet ü haşmetle Rüstemâne gelür
 19 Edâ-yı farz-ı cihâd eyleyüp sa‘âdet ile
 Revâ-yı hâcet-i cümle cihâniyâna gelür
 20 Zihî gazâ-yı ganâ’im-nisâr-ı sûd-âsâr
 Bürehne-pâ giden elbette kâmrâne gelür
 21 Görince ‘azmini Moskov kıralı gibi ‘anîd
 Amân-hâh olarak nâle vü figâna gelür
 22 Konardı cân-ı ‘adüv tîg-i hûn-feşân üzre
 O zâglar gibi kim şâh-ı ergavâna gelür
 23 Esîr itmiş iken Çarı eyledi âzâd
 Bu nusretüñ eseri şân-ı hânedâna gelür
 24 Ne feth ü nusret olur bu ki el-amân-hâhân
 Biri birin basarak zîr-i sâyebâna gelür
 25 Hoşâ bülendî-i nâm-ı şükûh u devlet kim
 Külâh-gûşe-i şân evc-i ferkadâna gelür
 26 Zihî zamân-ı tarab mevsim-i neşât u sürûr
 Bahâr tehniyet-i makdem-i hazâna gelür
 27 Hezâr mihnet-i endûh ile geçen vakti
 Zamâne şimdi mükâfât ile zamâna gelür
 28 Çeker bu menkıbe Şeh-nâme’ye hat-ı butlân
66
 Hikâye itmege nevbet bu dâstâna gelür
 29 Bu gazve-i zafer-encâm u nusret-i kübrâ
 Kıyâm-ı sâ‘ate dek söylenür lisâna gelür
 30 Du‘âya başla yeter Kâmiyâ şu vech üzre
 Hulûs-ı tamm ile dilden kopar dehâna gelür
 31 Hemîşe tâ ki sanâdîd-i kavm-i düşmen-i dîn
 Yüzini hâke sürüp ‘acz ile amâna gelür
 32 Hemîşe tâ ki hadeng-i guzât-ı dîn-i mübîn
 Be-kasd-ı sîne-i a‘dâ zih-i kemâna gelür
 33 Zevâlüñ isteyeni zâ’il eylesün Mevlâ
 Der-i sa‘âdetüñe olmasun ziyâna gelür
 34 Zamân-ı devlet-i ‘adlüñde ‘âlem olsun şâd
 Bu rûzgârda hîç kalmasun figâna gelür
 35 Seni hatâ vü hatardan masûn ide Allâh
 Zebân-ı hâmede ancak budur beyâna gelür
 
Yrd. Doç. Dr. Gülgün Erişen YAZICI,, Edirneli Kâmî ve Divanının Tenkitli Metni, (Basılmamış doktora tezi), A. Ü. Sosyal Bilimler Enstitüsü , Ankara, 1998,- https://ekitap.kulturturizm.gov.tr/Eklenti/10619,kamipdf.pdf?0