381
Mef‘ûlü/ Fâ‘ilâtü/ Mefâ‘îlü/ Fâ‘ilün
 
Alsa eline meclis-i mey içre yâr def
Ney nâle eglese aña gögsin kakar def
Girmiş eline bir iki pul yâre ‘arz ider
Bezm içre anı eylemek ister şikâr def
Vakt-i neşât irişdi zamân-ı şükûfeye
Güller açıldı çalsa ‘aceb mi hezâr def
Encüm pulıyla dâ’iresin zînet eyledi
Bezm-i felekde Zöhre çalar zer-nigâr def
Sâkî benefşe sundı yine ehl-i meclise
Ravzî eline gül gibi alsa ne var def
 
Dr. Yaşar AYDEMİR, RAVZÎ DİVANI, T. C. KÜLTÜR VE TURİZM BAKANLIĞI KÜTÜPHANELER VE YAYIMLAR GENEL MÜDÜRLÜĞÜ 3192 KÜLTÜR ESERLERİ ,Ankara 2009