Bir gül-i gül-bün-i nev-reste-i gülzâr-ı safâ

 

[MUSAMMATLAR]

1

Terkîb-bend-i ‘âşıkâne

Fe’ilâtün/ Fe’ilâtün/ Fe’ilâtün/ Fe’ilün

 Remel: . . - -/ . . - -/ . . - -/ . . –

 

1 Bir gül-i gül-bün-i nev-reste-i gülzâr-ı safâ

 Bir nihâl-i çemenistân-ı letâfet-pîrâ

 Bir lebi gonce-i zîbâ ruhı verd-i hamrâ

 Bir saçı sünbül-i ter kaddi bülend ü bâlâ

 Bir meh-i mihr ü vefâ semen ü sîmîn-sîmâ

 Bir sihir-perver ü efsûn-ger ü şûriş-efzâ

 Bir nigâh u müje vü dîdeleri fitne-nümâ

 Bir bakış ile iden ‘âşık-ı zârın şeydâ

 Aldı ‘aklum beni âvâre vü medhûş itdi

 Bir nazarda beni üftâ[de] vü bî-hûş itdi

2 Söylesem hâl-i dil-i zârumı ısgâ itmez

 Yüregüm yâresin açsam da temâşâ itmez

 Merhamet bende-i efgendeye aslâ itmez

 Hışmla dahı nigeh-i hâlüme kat’â itmez

 Var mı bir gün ki gelüp sabrumı yagma itmez

 Bunı bir ‘âşıka bir dil-ber-i ra’nâ itmez

 Vâmık olsam bu cefâyı bana ‘Azrâ itmez

 Belki Mecnûn dahı olsam bunı Leylâ itmez

 Hâlüme âh iderüm yok dehenümden gayrı

 Bakanum yok bana dâg-ı kühenümden gayrı

3 Beklerüm reh-güzerin şimdi güzâr ide diyü

 Cismümi pây-ı semendinde gubâr ide diyü

 Sînem üstinde gelüp cây-ı karâr ide diyü

 ‘Âşıkândan beni de ‘add ü şümâr ide diyü

 Gülşen-i hüsn ü cemâline hezâr ide diyü

 Murg-ı dil murg-ı gülistân gibi zâr ide diyü

 Gül-i dâg âb-ı sirişkümle bahâr ide diyü

 Belki feryâd-ı dilüm kalbine kâr ide diyü

 Âteşüm eşk ile teskîn iderüm bir pâre

 Gayrı gûne bulamam derd-i derûna çâre

4 Gamzesi sîne-i mecrûha çeker tîg-ı sitem

 Nigeh-i lutfı komaz rîş-i derûna merhem

 Aglasam derd ü gamı ile olur ol hurrem

Şâd olur her ne kadar olsam eger ben pür-gam

 Rahmı yok zerrece Allâhu Te’âlâ a’lem

 Böyle bî-dâda nice sabr idebilsün âdem

 Diyemem hâlümi kan aglayamam ben bir dem

 Korkarum söyleyemem derd ü gamından ölsem

 Böyle bir mâhveşün bendesi oldum şimdi

Şöyle bir ser-keşün efgendesi oldum şimdi

5 Eylemez ‘âşık-ı âvâresine ‘arz-ı cemâl

 Cân virürsem dahı itmez yine kerre su’âl

 Görmede lîk rakîbânumuz itmez ihmâl

 Virsün insâf hemân ana Hudâ-yı müte’âl

Bilürüm vaslunı hakkumda benüm emr-i muhâl

 Ez-kazâ düşdi ne çâre ana tab’-ı meyyâl

 Bahs-i ‘aşkında dahı pek uzadı kîl ile kâl

 Kalmadı çekmege de firkatini dilde mecâl

 Yâverâ çâresi aglayalum sabr idelüm

 Âh-ı cânkâh idelüm cânumuza cebr idelüm

 

Dr. Kaplan ÜSTÜNER, ENDERUNLU HASAN YÂVER DİVAN [İnceleme-Metin-Çeviri-Dizin], https://ekitap.kulturturizm.gov.tr/Eklenti/10608,enderunlu-hasan-yaver-divanipdf.pdf?0