Bir lâciverdî kâsede her subh mihr altun ezer

 

Müstef`ilün müstef`ilün müstef`ilün müstef`ilün

 

 1 Bir lâciverdî kâsede her subh mihr altun ezer

 Vasf-ı cemâlün yazmaga cânâ gerekdür hall-i zer

 2 Başı açık yalın ayak abdâlun olmuşdur güneş

 Bir yirde ârâm eylemez şevkünle dünyâyı gezer

 3 Her gonce dest-i şâhda bir nâme-i ser-bestedür

 Bülbül iver kim açıla zımnında maksûdun sezer

 4 Bâgun mutarrâ sünbüli başlar açılmaga kaçan

 Gördükçe anı sanurum bir dil-rübâ zülfün çözer

 5 Çok nâ-tüvânı eyledi Yahyâ tüvânger lutf-ı şâh

 Ankâ-yı kâf-ı himmeti besler hezârân zâl-i zer

 

 

Hasan KAVRUK , ŞEYHÜLİSLAM YAHYÂ DÎVÂNI,  T. C. KÜLTÜR VE TURİZM BAKANLIĞI KÜTÜPHANELER VE YAYIMLAR GENEL MÜDÜRLÜĞÜ 3147