Biz cûş-ı hevâ ile ki sahrâya çekildük
16.09.2017
377
Mef‘ûlü Mefâ‘îlü Mefâ‘îlü Fe‘ûlün
1 Biz cûş-ı hevâ ile ki sahrâya çekildük
Seyl-âb gibi cânib-i deryâya çekildük
2 Bî-sabr u sükûn câzibe-i ‘aşk ile çün âb
Cevlângeh-i serv-kad-i bâlâya çekildük
3 Hâk eyleyeli cismümüzi kûy-ı fenâda
Çün sürme nice dîde-i bînâya çekildük
4 Sâgar gibi ser-geşte-i devrân degülüz biz
Kim hum gibi bir gûşe-i tenhâya çekildük
5 SÂKIB olalı zîver-i ser-rişte-i ‘irfân
Mânend-i güher ‘ıkd-ı Süreyyâ’ya çekildük
Kırbıyık, Mehmet. Kâtib-zâde Sâkıb Dîvânı. https://ekitap.kulturturizm.gov.tr/dosya/1-275466/h/katibzade-sakib.pdf [erişim tarihi: 01.05.2013]
Yorum Yapmak için Kayıt Olun veya Giriş Yapın