Biz tarîk-ı Halvetî ‘âşıklarıñ handânıyuz
06.06.2016
Fâ‘ilâtün Fâ‘ilâtün Fâ‘ilâtün Fâ‘ilün
1 Biz tarîk-ı Halvetî ‘âşıklarıñ handânıyuz
Cân-ıla baş virmege dôst yolınıñ merdânıyuz
2 Biz çerâgı Şâh-ı merdân şem‘asından yandırıp
Anca dillerde hakâyık şehri[niñ] şem‘dânıyuz
3 ‘Âlimü’l-gaybıñ vücûdı nûrınıñ şehrindenüz
Bu kafes cisminde geldük habs olan zindânîyüz
4 ‘Âlem-i gaybı şehâdetdür bizüm seyrânımuz
‘Ârif-i billâh-i ‘âlem vâsıl-ı ferdânîyüz
5 Sûret-i fakr ü fenâda hâke yeksânuz veli
Siret-i mülk-i bekânıñ nûr-ı gevherdânıyuz
6 Vuslat âbın içmeyenden gizlidür erkânımuz
‘Âlem-i vahdet bâgınıñ meyiniñ mestânıyuz
7 ‘Arş u kürsî nüh felekdür dem-be-dem seyrânımuz
sûret-i nakş-ıla dôstlar añlamañ gerdânîyüz
8 Aslımuz ahsen-i takvîm ‘âlem-i asliyyedür
İrmege ‘aşk-ıla hâzır durmuşuz meydânîyüz
9 Erba‘în-i halvetiñ ‘aşkında ‘uzlet bekleyüp
‘İlm ü ‘irfân iklîmin seyrân iden sırdânîyüz
10 Tevhid-i zât-ı İlâhidür bizüm varlıgımız
Ol hakikat bahrına pertâb iden dürdânîyüz
11 Hak bilür Allâhu a‘lem lâf u tezvîr eylemez
Dir Sinân Ümmî cihânda sâhibü’l-vicdânîyüz
Doç. Dr. A. Azmi BİLGİN,ÜMMÎ SİNAN DİVANI,K.veTurzm.Bak.,ekitap.kulturturizm.gov.tr
