Boyundur sidre vü tûbâ dudağun âb-ı hayvândur
Anun mâhiyyet-i zevkın ne bilsün ol ki hayvândur
Yüzün innâ fetahnâdur tebârek şânına münzel
Bu vechi ahsen-i sûret dinilür ehl-i irfandur
Ruhun gülzârına karşu kızardı magribün rengi
Tulû-ı maşrıka zülfün nesîmi anber-feşândur
Cemâlün pertev-i nûrı münevver kıldı âfâkı
Dudağun âb-ı hayvânı saçun zulmunda pinhândur
5. Hadîs-i gevher-efşânun hidâyetdür nihâyetsüz
Ukûlı ehl-i irfânun anun şerhinde hayrândur
Visâlün hasret-i nârı meni yahdı firâkunda
Ne mâhiyyetsin ey cân kim cemâlün hûr u rızvândur
Hakîkî çün seni gördi münezzeh oldı âlemden
Gözünde sûret-i Rahmân dilinde zikr-i Sübhândur
 
CİHÂNŞÂH HAKÎKÎ’
 
Muhsin Macit, Karakoyunlu Cihanşah'ın Türkçe Şiirleri, Kültür ve Turizm Bakanlığı Kütüphaneler ve Yayımlar Genel Müdürlüğü, Ankara 2017, ISBN: 978-975-17- 3631-4 Ana Yayın Numarası: 3368