Bu âşûba mey-i la`lün midür sahbâ mıdur bâ`is
05.04.2016
GAZEL
33
Mefâ'îlün mefâ`îlün mefâ`îlün mefâ`îlün
1 Bu âşûba mey-i la`lün midür sahbâ mıdur bâ`is
Kıyâmet mi kopar ol kâmeti bâlâ mıdur bâ`is
2 Yüzime yâr bakmaz söylesem redd-i cevâb itmez
Günâhum var mı yohsa nâz u istignâ mıdur bâ`is
3 Halâs olmadı hîç cân-ı za`îfüm şûr u gavgâdan
Bileydüm dîde mi âyâ dil-i şeydâ mıdur bâ`is
4 Bilürken bî-bekâ oldıgın âb üzre olan nakşun
Bu meftûnluklara ârâyiş-i dünyâ mıdur bâ`is
5 Ezel bezmindeki câm-ı mahabbet mestisin Yahyâ
Belâ-keş Kays'a Mecnûn olmaga Leylâ mıdur bâ`is
Hasan KAVRUK, ŞEYHÜLİSLAM YAHYÂ DÎVÂNI, T. C. KÜLTÜR VE TURİZM BAKANLIĞIhttps://ekitap.kulturturizm.gov.tr/Eklenti/
