[mefâ’îlün mefâ’îlün mefâ’îlün mefâ’îlün]
1 Bugün Mecnûn-ı ‘ışkam devr elinden bir melâlüm var
Yürürem vâdi-i hayretde bilmem kim ne hâlüm var
2 Belâdur şâhsârı berg ü bârı mihnet ü gamdur
Dıraht-ı ‘ışk dirler bâg-ı dilde bir nihâlüm var
3 Gedâ-yı kûy-ı yârem cerr içün bâzâr-ı ‘ışk içre
Şikest olmış elümde kâse-i serden sifâlüm var
4 Rumûzın hurde-dânlar idemezler zerrece idrâk
Dehân-ı yâre beŋzer yine bir nâzük hayâlüm var
Cevâbın viremez müftî-i ‘âlem ey Mesîhâ-dem
Kitâb-ı ‘ilm-i ihyâda lebüŋden bir su’âlüm var
6 Belâdan gam yimezdi ‘arsa-i ‘ışkuŋda hâk olsa
Diseŋ Rahmî gibi bir ‘âşık-ı şûrîde-hâlüm var
Yard. Doç. Dr. Mustafa Erdoğan, BURSALI RAHMÎ VE DÎVÂNI, T. C. KÜLTÜR VE TURİZM BAKANLIĞI KÜTÜPHANELER VE YAYIMLAR GENEL MÜDÜRLÜĞÜ 3363 KÜLTÜR ESERLERİ , 2011,