Fâ‘ilâtün Fâ‘ilâtün Fâ‘ilâtün Fâ‘ilün
 
1. Cânib-i Hak'dan müsellemdir dilâ hizmet sana
 ‘Âlem-i dâreynde yetmez mi bu ni‘met sana
2. Odlara düşdün dem-â-dem âh bir âh itmedin
 Âşikârâdur ki irmiş bir nefes himmet sana
3. Mugların öpdün ayağın secde kıldın bütlere
 Ser-firâz oldun kılur her bâde-keş hurmet sana
4. Çeng çaldın câm çekdin bâde içdin her ne var
 Kıldın Allâh ‘aşkına olsun helâl ‘işret sana
5. Kahrdandır sanma eltâf-ı Hudâdır şükr kıl
 Her zamân bir meh-likãya ibtilâ kısmet sana
6. Terk-i seyr it gayrdan kes ihtilâtı ey mürg-i dil
 Bes degül mi fikr-i gül-ruhsârıla sohbet sana
7. N’ola Eflâtun Aristo senden ister bir kemâl
 Ögredüpdür gamze-i dildâr kim hikmet sana
8. Terk-i tecrîd eyleyüp kıldın fenâ mülkin vatan
 Besdir ey Mîr Nigârî bâkî bu devlet sana
 
SEYYİD MÎR HAMZA NİGÂRÎ
Prof. Dr. Azmi Bilgin , Nigârî [ö. 1885], DÎVÂN, 2011, T. C. KÜLTÜR VE TURİZM BAKANLIĞI KÜTÜPHANELER VE YAYIMLAR GENEL MÜDÜRLÜĞÜ, 3289 KÜLTÜR ESERLERİ 482