Fāʿilātün fāʿilātün fāʿilātün fāʿilün

Çekmeyen bilmez nedür yārüñ cefāsı özgedür
Düşmeyen bilmez nedür hicrüñ belāsı özgedür

Olmayan ʿāşıḳ ne bilsün ehl·i ʿışḳuñ ḥālini
Şerḥ olınmaz bu beyānuñ mācerāsı özgedür

Rāstī seyr eyle ʿuşşāḳı nevālar gösterür
Dilleri ḥayrān ider ʿışḳuñ ṣadāsı özgedür

Ḫalvetüñde zāhidā ʿayb itme ehl·i ʿışḳa sen
Künc·i ġamda ʿāşıḳuñ da bī-riyāsı özgedür

İşüñ altun itmek isterseñ yüzüñ zer eylegil
Ṭālib·i iksīr·i ʿışḳ ol kimyāsı özgedür

Būy·ı zülf·i dil-berüñ ġayrin getürme ey ṣabā
Bu dil·i sūzānuma ḳıble hevāsı özgedür

Bir ṭabībe ben didüm bīmār·ı ʿışḳa çāre ne
Didi dilber vaṣlıdur anuñ devāsı özgedür

Bir perīnüñ ḥalka·i zülfine nā-gāh oldu ṣayd
Şimdi Mihrī miskīnüñ dām·ı belāsı özgedür

Prof. Dr. Mehmet Arslan, Mihrî Hâtun Dîvânı, T.C. Kültür ve Turizm Bakanlığı Kütüphaneler ve Yayımlar Genel Müdürlüğü, 2018 ISBN: 978-975-17-4027-4