Mefâ`îlün mefâ`îlün mefâ`îlün mefâ`îlün
1 Dem-â-dem gûşe-i mey-hânede humlar gelür cûşa
Nasîb olmadı zühhâda cihânda böyle bir gûşe
2 Tutalum ben garîbi lutf ile anmaga bâ`is yok
Sebeb ne ey cefâ-cû itdügün cevri ferâmûşa
3 Biraz dahı kalur mı ser-be-mühr ol hüsrevânî hum
Elün degmez mi (ey) pîr-i mugân bir kerre ser-pûşa
4 Cem-i devrânı oldı câm-ı gerdânıyla dünyânun
Sipihrün seyr idün ikbâlin ol rind-i kadeh-nûşa
5 Nasîbüm künc-i mihnetde gam-ı gamzeyle hûn-ı dil
Kanâ'at ehline Yahyâ yeter bir gûşe bir tûşe
Hasan KAVRUK , ŞEYHÜLİSLAM YAHYÂ DÎVÂNI, T. C. KÜLTÜR VE TURİZM BAKANLIĞI KÜTÜPHANELER VE YAYIMLAR GENEL MÜDÜRLÜĞÜ 3147