8
Der-Hakk-ı Tuğrâ-yı Sultân Ahmed Hân
mefâ‘îlün mefâ‘îlün mefâ‘îlün mefâ‘îlün
1 Zihî ferhunde-dem kim zâhir oldı lutf-ı Yezdânî
Görindi ma‘rifet şâd eyledi erbâb-ı ‘irfânı
60
2 Nice şâd olmasun erbâb-ı dâniş hayli demlerdür
Ma‘ârif ehlinüñ ‘âlemde yokdur şöhret ü şânı
3 Perîşân oldı ehli rû be-râh-ı hayret olmışlar
Hünermendân-ı ‘asruñ şöyle hâlî kaldı meydanı
4 Çıkarmaz çok zamândur Hâce-i duhter-fürûş-ı dehr
Ser-i bâzâra ‘irfân nâmına bir şûh-ı devrânı
5 ‘Aceb mi olsa müflis yek-sere erbâb-ı isti‘dâd
Tehî kalmış metâ‘-ı ma‘rifetden sûk-ı sultânî
6 Bi-hamdi’llâh kemâlin buldı erbâb-ı hünermendân
Zuhûr itdi ma‘ârif burcınuñ mihr-i dırahşânı
7 Cenâb-ı pâdişâh-ı heft-kişver ma‘delet-güster
Şehinşâh-ı mu‘azzam ya‘ni Sultân Ahmed-i sânî
8 Ma‘ârif semtine meyl eyleyüp tab‘-ı hümâyûnı
Kemâlâtıyla oldı mazhar-ı eltâf-ı Sübhânî
9 Nazîr olmaz egerçi hüsn-i hatt-ı destine ammâ
Ne ra‘nâ çekmiş ol tuğrâ-yı garrâ-yı zer-efşânı
10 Ne tuğrâ dil-rübâ zîbende bir tâvus-ı ra‘nâ kim
İder ta‘lîm murgân-ı bihişte semt-i cevlânı
11 Ne tuğra bir mutalsam genc-i ikbâl-i şehinşâhî
Sezâdur virse hükm-i şevket-i mühr-i Süleymân’ı
12 Ne tuğra bir musanna‘ keştî-i bahr-i sa‘âdet kim
Zafer dûşında gûyâ bâdbân-ı ‘ibret elvânı
13 Ne tuğra ol huceste-nâm-ı sultân üstine gûyâ
Kurılmış bir mu‘azzam çetr-i vâlâ-yı cihânbânî
14 Ne tuğra beyza-i hemvârınuñ meftûnıdur Bihzâd
Ne beyza devrinüñ çerh oldı ser-gerdân u hayrânı
15 Degüldür beyza gûyâ bir tılısm-ı vefk-i hikmetdür
Ekâlîmi musahhar itmedür hâsıyyet-i şânı
16 Çeküp bir lahzada ol pâdişâh-ı mülk-i isti‘dâd
Bu tuğra-yı ferah-zâ vü nişân-ı behcet-‘unvânı
17 Vezîr-i a‘zamına gönderüp anı sa‘âdetle
Bu gûne bir eserle eyledi memnûn-ı ihsânı
61
18 Nice memnûn u dil-şâd olmasun ol bende kim gördi
Veliyy-i ni‘metinden böyle bir lutf-ı firâvânı
19 Nice raks itmesün şevk u neşâtından ki yâd itdi
Hünerver bende-perver pâdişâh-ı bahr ü ber anı
20 Ko tasdî‘i du‘â-i devletin kıl Kâmiyâ şimdi
Du‘â hengâmıdur terk eyle güftâr-ı perîşânı
21 Nişân-ı devlet ol tuğra-yı garrâ-yı ferah-bahşâ
Ola tâ zîver-i dîbâce-i her hükm-i sultânî
22 Hudâ ‘ömrin mezîd ikbâlin efzûn eyleyüp dâ’im
Hatâsuz eylesün ol pâdişâh-ı milk-i ‘irfânı
Yrd. Doç. Dr. Gülgün Erişen YAZICI,, Edirneli Kâmî ve Divanının Tenkitli Metni, (Basılmamış doktora tezi), A. Ü. Sosyal Bilimler Enstitüsü , Ankara, 1998,- https://ekitap.kulturturizm.gov.tr/Eklenti/10619,kamipdf.pdf?0