DER-MEDH-İ SULTÂN BÂYEZÎD HÂN HALLEDALLÂHÜ MİLKEHÛ*
Fâilâtün/Fâilâtün/Fâilâtün/Fâilün
 
1. Şâhid-i gül burka’ın çün kim götürdi subh-dem
Bülbül-i gûyây tutsa tan mıdur her subh dem
2. Virür emvât-ı nebâta yine bin dürlü hayât
Her dem enfâs-ı Mesîhâ birle bâd-ı subh-dem
3. Hâr elinden lâle-veş gonca ciger-hûn olmagın
Yaş yirine bülbül-i gûyâ döker her subh dem
4. Her seher vaktinde bülbül yanup olmasun mı kül
Sanki her gül âteş-i sûzân olupdur subh-dem[4]
5.Bûstân-ı âlem oldı ravza-i huld-i berîn
Gül-şen-i nîlûferîden nice urur subh dem[5]
6. Âteş-i Vâdî-i Eymenden yakupdur gül çerâğ
Bülbül-i gûyâ Kelîmullâh gibidür lâ-cerem
7. Şem’-i lâle her gice kalsa sabâha tan mıdur
Nergis-i şehlâ elinden gitmez aslâ câm-ı Cem
8. Mehd-i şâh üzre ımızgansun diyü etfâl-i gül
Arkun arkun bâd-ı subh ögrer ki vire neşv ü nem
9. Sanki tûtî-beççedür burnın çıkarmış beyzadan
Her çemen kim yinile bitmişdür ey dil bîş ü kem
10. Çıkmadan gehvâreden Îsâ gibi sûsen henûz
Söze dil uzatdı her güftârdan urmaga dem
……….
 
18. Goncanun katdı ferahdan handeyile yüregi
Bâde-i gül-gûn içelden zaferân ile be-hem
19. Hurrem olsun diyü sultân-ı gül ey dil âb-rûd
Gösterür âvâzeler birle sürûd-ı zîr ü bem
20. Sâkîyâ gül devridür câm-ı muravvak sun berü
Çarh-ı kec-reftâr dönsün niçe dönerse ne gam
21. Her nefes bâd-ı nesîm âb-ı revân üzre yazar
Sad hezârân sûret-i Çîn bî-devât u bî-kalem
22. Taldırur bâd-ı sabâ nîlûferün başın suya
Kîse-i gülden zer aldun diyü olmış müttehem
23. Şâhid-i gül karşusına bülbül-i gûyâ-yı mest
Sad hezâr okur bunun gibi gazeller dem-be-dem
24. Ey cemâli lâle-zâr-ı gül-şen-i bâğ-ı İrem
Lebleründür gonca-i sîr-âb-ı gül-zâr-ı adem
25. Her şükûfe gözin açmışdur dener bin cân ile
Sen gül-endâmı temâşâ kılmaga ser-tâ-kadem
26. Cennetün sankim zümürrüd kasrıdur gılmân ile
Sebze-zâr-ı kûşe-i gül-şen senünle ey sanem
………..
36. Gül-bün-i gül-zâr-ı devlet hazret-i Şeh Bâyezîd
Mâlik-i mülk-i Arabdur Hüsrev-i Türk ü Acem
37. Mesned-i şer-i resûl ol şâh-ı ins ü cân k’odur
Gül gibi vech-i hasen birle şeh-i Yûsuf-şiyem
38. İtidâl-i devr-i adlidür zamânun revnakı
Âlem eyyâm-ı bahâr ile olur bes mugtenem[38]
39. Bûstân-ı feyzine halk-ı cihân yüz tutdugı
Hergiz andan kimse lâ işitmedi illâ neam
40. Sofra-i cûdunda şâhâ fî’l-mesel bir kâsedür
Her ne denlü tolsa bâğ-ı âlem envâ-ı niam
41. Sad hezâr olsa şükûfe küllinün güldür şehi
Nitekim sen Hüsrevisin şehler olmışdur hadem
42. Nefha-i bâd-ı nesîm-i adl-i rûh-efzân ile
Oldı ebter defter-i fasl-ı zemistân-ı zalem
………..
 
50. Dest-i sîm-efşânuna öykünmegin bâd-ı sabâ
Her dem etrâf-ı cihân içre nisâr ider direm
51. Devr-i adlünde sadâ-yı heybetün hıfz itmegin
Sebze-zâr içre yürür gürg ile sahrâda ganem
52. Âlemi gül gibi handân itmege her geh gelür
Âsmân-ı lutfun üzre ebr-i nîsân-ı kerem
53. Dest-i gevher-bârunun vasfını idelden sabâ
Şerm ile cây-ı sadef âlemde oldı kar-ı yem
54. İşidelden bûstân-ı devletünün revnakın
Bitdi düşmen yüreginde harbüze gibi verem
55. Ebr-i nîsân mest olup dökdükçe şöyle cür’alar
Lâle vü nergis sabûh itdükçe gül-şende be-hem
56. Hûb-rûlar gibi nâza başladukça goncalar
Sad hezâr itdükçe bülbüller niyâz ile nagam
57. Gül-sitân-ı ömrüni ser-sebz ü sîr-âb eyleyüp
Lutf-ı Hak kılsun ziyâde devletüni dem-be-dem
…………
Ersen ERSOY,  II. BAYEZİD DEVRİ ŞÂİRLERİNDEN MÜNÎRÎ HAYATI,ESERLERİ VE DÎVÂNI (İNCELEME-TENKİTLİ METİN) https://ekitap.kulturturizm.gov.tr/Eklenti/10631,muniripdf.pdf?0