12
Der-Menkabet-i Dâmâd ‘Ali Paşa-yı Şehîd
Rahimehu’llâhu Te‘âlâ
mefâ‘îlün mefâ‘îlün mefâ‘îlün mefâ‘îlün
1 Kalem kim nükte-senc-i milket-i ma‘nâ vü inşâdur
Bu gûne mû-şikâf-ı dikkat-i mebhasla gûyâdur
2 Cemâl-i şâhid-i ma‘nâ güzel pâ der-rikâb ammâ
Müsellem hüsn-i hat ‘âlemde dâ’im safha-pîrâdur
69
3 Husûsâ şîve-i hüsn-i hat-ı ta‘lîk-i ra‘nânuñ
Ki her bir noktası reşkîn-i hâl-i ‘anberâsâdur
4 Nice tercîh olınsun hüsn-i sîret hatt-ı zîbâya
Ta‘alluk anda gûn-â-gûn olur bu rûh-efzâdur
5 Egerçi ma‘rifetdür şi‘r ü inşâ semti de ammâ
Zekât-ı hüsni bundan anlaruñ kârı temennâdur
6 Eyâ kilk-i hünerver müdde‘îsin gerçi sen ammâ
Delîli nakli yok senden bu bir bîhûde da‘vâdur
7 Senüñ tashîh-i nakle kudretüñ yokdur tarafdâruñ
Meger sahh-ı şerîf-i âsaf-ı fermân-fermâdur
8 Penâh-ı ma‘rifet dâmâd-ı hâkân-ı semâ-rif‘at
‘Ali Pâşâ-yı ekrem nûr-bahş-ı çeşm-i dünyâdur
9 Hudâvend-i cihân-ı fazl u dâniş ‘âlim ü ‘âdil
Bekâ-yı devleti ser-mâye-i a‘lâ vü ednâdur
10 Vezîr-i a‘zam-ı Hâtem-şiyem tedbîr ile mülhem
Müsellem câmi‘-i seyf ü kalem nezzâm-ı dünyâdur
11 Nihâl-i hoş-hırâm-ı bâğ-ı ‘izzet gülbün-i devlet
Serîr-ârâ-yı mülk-i ma‘delet ‘âlemde yektâdur
12 Riyâz-ı ‘âleme hîç bu nizâmı virmedi kimse
Bu te’yîd-i İlâhi ‘avn-i Hak tevfîk-i Mevlâdur
13 Yed-i beyzâsına vâ-beste ser tâ-pâ umûr-ı mülk
‘Asâ-yı kilki a‘dâ def‘ine i‘câz-peymâdur
14 Umûr-ı mu‘zamât-ı dîn ü devlet hall ü ‘akdinde
Benân-ı mû-şikâfı çâre-sâz-ı cümle dünyâdur
15 Hayât-ı tâze buldı bâğ-ı ‘âlem hüsn-i hulkından
Cemâl-i enveri reşk-i bahâr-ı feyz-bahşâdur
16 Hudûd-ı dîni hâfız hâmi-i şer‘-i mutahhar kim
Vücûdı ‘âlemüñ nakd-i hayâtı ‘âlem-ârâdur
17 Fesâhat-rîz olan her nüktesi hayret-dih-i hikmet
Belâgat-senc olan nutk-ı güher-bârı temâşâdur
18 Bu vehbi fazl u dâniş sa‘y u gûşişle degül mümkin
Bu bir feyz-i İlâhî hall olınmaz bir mu‘ammâdur
70
19 Nisâr-ı hâk-i pâyı olmağa şâyeste midhat yok
Du‘â-yı devletinden gayrı sözler cümle bî-câdur
20 Hıdîvâ âsafâ re’fet-penâhâ âsmân-kadrâ
Kapuñ gül-mîhi olmak hasret-i necm-i Süreyyâdur
21 ‘İnâyet va‘di sebk itmişdi sâbık şeyhü’l-islâma
Sebeb hırmâna ancak inkılâb-ı sadr-ı fetvâdur
22 Ser-i ebrû ile îmâ iderse şâhid-i lutfuñ
Cemâl-i matlabum mir’ât-i bahtumda hüveydâdur
23 Makâmuñda seni dâ’im ide ‘izzetle devletle
Cenâb-ı Kibriyâ kim kâr-sâz-ı cümle eşyâdur
Yrd. Doç. Dr. Gülgün Erişen YAZICI,, Edirneli Kâmî ve Divanının Tenkitli Metni, (Basılmamış doktora tezi), A. Ü. Sosyal Bilimler Enstitüsü , Ankara, 1998,- https://ekitap.kulturturizm.gov.tr/Eklenti/10619,kamipdf.pdf?0