15
Der-Menkabet-i Dâmâd İbrâhîm Paşa Berây-ı
Hem-pâye Şoden-i Mekke vü Medine
fe‘ilâtün fe‘ilâtün fe‘ilâtün fe‘ilün
1 Bir seher ki heves-i hâtıra-i dâ‘i-i zâr
Dergeh-i devlete yüz sürmege virmişdi karâr
2 ‘Azm idüp pîşgeh-i âsaf-ı gerdûn-câha
Dilde evrâd-ı du‘â serde mükevver destâr
3 Nice âsaf ki odur revnak-ı gülzâr-ı cihân
Nice âsaf ki odur cümle nizâm-ı aktâr
4 Âsmân-kevkebe hem-nâm-ı Halîl İbrâhîm
75
Sıhr-i sultân-ı cihân pâdişeh-i mihr-âsâr
5 ‘Âdet üzre ‘ulemâ ile varup meclisine
Eyledüm tûl-i bekâsına du‘âyı tekrâr
6 Cümleye nîm tebessümle nevâzişler idüp
Bir meserret haberin eyledi gûyâ iş‘âr
7 Didi kim şevket ile pâdişeh-i heft-iklîm
Oldı câh-ı ‘ulemâ rif‘atini hâhişger
8 Ne revâ belde-i hicretgeh-i fahr-i ‘âlem
Rütbesi mansıb-ı mahrecden ola dûn-şumâr
9 Eyledi hatt-ı şerîf ile anuñ pâyesini
Mansıb-ı Mekke vü Bathâ’ya ber-â-ber hemvâr
10 Gösterüp hatt-ı hümâyûnı sa‘âdetler ile
Gördüm ammâ ki ne hat mevce-i bahr-i envâr
11 Selsebîl oldı sutûrından akar âb-ı zülâl
Harf atar zâ’ika-i sükkere asl-ı güftâr
12 Nedür ol sebk-i fesâhat nedür ol hatt-ı belîg
Nedür ol zarf-ı hurûf içre ma‘ânî ser-şâr
13 Görse terkîb-i safâ-bahş ile inşâsın eger
‘Aczini eyler idi sıdk ile Vassâf ikrâr
14 Neye teşbîh ideyüm anı ki yok aña nazîr
Nev-demîde hat-ı dildârı idersem izhâr
15 Andan ancak nigeh-i ‘âşıka bahşâyiş-i zevk
Bunuñ âşüftesidür cümle-i enzâr-ı kibâr
16 Gonce-i hâtırın açdı ‘ulemânuñ el-hak
Oldı ma‘nâda bu gülzâra hümâyûn ezhâr
17 Dizdi gûyâ ki nigeh rîştesine ser tâ-pâ
Nazar-endâz olan ol gevhere dise şehvâr
18 Añladum cümle mazâmîn-i latîfin ol dem
Bûs idüp başuma koydum iderek medh-i hezâr
19 Nice medh itmeyeyüm ben bu ‘azîz ihsânı
Nice raksân olarak olmayayum zevke dûçâr
20 Yâz-deh sâle irismişdi egerçi pâyem
76
Nevbetüñ gelmege dirlerdi dahı on yıl var
21 Hamdü li’llâh ki ‘atâyâ-yı şehinşâhîden
Bir iki yılda ider matlabum ‘arz-ı dîdâr
22 Hak Te‘âlâ o şehinşâh-ı felek-‘unvânı
Böyle memdûh esere ide muvaffak her bâr
23 Hüsrevân-ı selefüñ gelmedi hîç hâtırına
Böyle ferhunde kerem böyle mübârek âsâr
24 Kâmiyâ sür yüzüñi hâke du‘âlar eyle
Turma şimden gerü etbâ‘uñ ile leyl ü nehâr
25 Gülşen-i saltanatı bula kemâl-i revnak
Gül-i sad-berg-i vücûdı ola zîb-i gülzâr
Yrd. Doç. Dr. Gülgün Erişen YAZICI,, Edirneli Kâmî ve Divanının Tenkitli Metni, (Basılmamış doktora tezi), A. Ü. Sosyal Bilimler Enstitüsü , Ankara, 1998,- https://ekitap.kulturturizm.gov.tr/Eklenti/10619,kamipdf.pdf?0