Der-Menkabet-i Hazret-i Gülşenî
 
 fâ‘ilâtün fâ‘ilâtün fâ‘ilâtün fâ‘ilün
 
 1 Nûr-ı çeşm-i Rûşenî ya‘ni Cenâb-ı Gülşenî
 Hazret-i zât-ı mükerrem kutb-ı âfâk-ı zamân
 2 Şâh-ı iklim-i velâyet reh-nümâ-yı râh-ı Hak
 Pîşvâ-yı evliyâ ‘ankâ-yı Kâf-ı lâ-mekân
 3 Şehr-i Amid’den vücûda geldi ol zav‘-ı vücûd
 İtdi tekmîl-i ‘ulûm idince Tebrîz’i mekân
 4 Gonce-i maksûdını açdı Karabağ illeri
 Anda buldı Rûşenî’yi bâ-hezârân ‘izz ü şân
 5 Bezm-i pür-feyz-i cenâb-ı Rûşenî’den ‘âkıbet
 Câm-ı ‘aşkı nûş idüp ‘âlemde oldı kâmrân
 6 Fazl u ‘irfânı güvâhıdur kitâb-ı Ma‘nevî
 Pey-revidür virmesün mi Mesnevî andan nişân
169
 7 Dizdi bir silke hakîkat bahrinüñ gevherlerin
 Mâlik-i genc-i ma‘ârif oldığın itdi ‘ayân
 8 Rûşen iken gülşen-i zâtında feyz-â-feyz-i Hak
 İtdiler ‘asrında ol kutb-ı zamânı imtihân
 9 Zühd ü takvâ ile irişdi yüz on dört yaşına
 İtdi dünyâdan tokuz yüz kırkda ‘azm-i cinân
 10 Âsitânıdur ma‘ârif ehline cây-ı makar
 Tekyegâhıdur kemâl erbâbına ârâm-ı cân
 11 Mekteb-i ‘irfândur her tekyesi nüzhet-fezâ
 Halka-i zikr ü semâ‘ı reşk-i devr-i âsmân
 12 Cümleden bu tekye-i İskenderiyye cây-ı feyz
 La-mekân âvâre dervîşâna tuhfe âşiyân
 13 Ey gül-i bâğ-ı velâyet mülk-i feyzüñ gülşeni
 Yüz süren dergâhuña mahrûm kalmaz bî-gümân
 14 Hâzır olsun üstine zıll-ı hümâ-yı himmetüñ
 Çün dahîlüñdür senüñ Kâmî-i zâr u nâ-tüvân
 
Yrd. Doç. Dr. Gülgün Erişen YAZICI,, Edirneli Kâmî ve Divanının Tenkitli Metni, (Basılmamış doktora tezi), A. Ü. Sosyal Bilimler Enstitüsü , Ankara, 1998,- https://ekitap.kulturturizm.gov.tr/Eklenti/10619,kamipdf.pdf?0