Der sitâyiş-i Sultân Osmân Hân `aleyhi'r-rahme

 

 

Mef`ûlü fâ`ilâtü mefâ`îlü fâ`ilün

 

 1 Gül olmasun mı hürrem ü handân u şâdmân

 Meyl itdi gül donanmasına şâh-ı kâmrân

2 Açılmasun mı gül gibi gülşende gonceler

 Bu iltifâtı kim güle itdi şeh-i cihân

3 Iyd oldı bâga makdem-i sultân-ı kâm-yâb

 Gülgûnî câmesini nola giyse gülsitân

4 Pîrâhenini itmege hoş-bûy güllerün

 Şeb-nem gül-âb u gonce-i ra`nâ gül-âbdân

5 Şâyed ki câmesin degişe şâh-ı gül diyü

 Yanınca dâ'imâ götürür gonce câmedân

6 Bu fasl-ı mu`tedilde ki gülzâra varıla

 Lâyık budur ki gülden ola çetr ü sâyebân

7 Deryâ-misâl havzda gör `aks-i gülleri

 Gûyâ donanma oldı deniz yüzine revân

8 Devr-i nücûmı gösterür evrâkı güllerün

 Ab üzre oldugınca nesîm-i sabâ-vezân

9 Pür ateş itdi nahl-i gül-i âli nahl-bend

 Hiç görmedüm donanmada bir böyle pehlevân

5

10 Gülden ki düzdi Mühr-i Süleymân misâlini

 Teshîr itdi bülbüli ol merd-i kâr-dân

11 Bir çûb-i huşkı serv-i gül-endâm ider eger

 Fermân iderse şâh-ı güzîn-i kadr-tüvân

12 Revnak-dih-i bahâr-ı gülistân-ı Ahmedî

 Osmân Hân-ı Cem-`azamet dâver-i zamân

13 Ol devha-i sa`âdet u ikbâl kim anun

 Hoş-hâl sâyesinde cihân u cihâniyân

14 Eyyâm-ı `adli mevsim-i gül gibi mu`tedil

 Bâd-ı bahâr-ı lutfı safâ-bahş-ı ins ü cân

15 Bi`z-zat kendi dinledi feryâd-ı bülbüli

 `Ahdinde kimse eyleye mi kimseden figân

16 Devrinde dil mi kaldı açılmaya gül gibi

 Gûyâ ki gül donanmasıdur ser-be-ser cihân

17 Kalmadı şimdi kimse muhâlif` Irak'da

 Uydı usûle nagme-serâyân-ı Isfehân

18 Gösterdi ser-fürûlarını sürh-serlerün

 `Aks-i nihâl-i gonce olup âbda `ıyân

19 Yahyâ'yı bülbül itdi bahâr-ı `inâyetün

 Gülzâr-ı midhatünde nola olsa medh-hân

20 Gülde olaydı kadrini vasf itmeye mecâl

 Olurdı `andelîb ile vasfında hem-zebân

21 Şi`rüm ki oldı tâze güli bâg-ı vasfınun

 Lâyıkdur olsa câygehi fark-ı Ferkadân

22 Nite ki güller açılsa bâg-ı vücudda

 Nite ki gerdiş eyleye dolâb-ı âsmân

6

23 Gülzâr-ı devletün ola şâd-âb dâ'imâ

 Her dem bahâr ola nitekim gülşen-i cinân

7

Hasan KAVRUK , ŞEYHÜLİSLAM YAHYÂ DÎVÂNI,  T. C. KÜLTÜR VE TURİZM BAKANLIĞI KÜTÜPHANELER VE YAYIMLAR GENEL MÜDÜRLÜĞÜ 3147