DER-VAKT-İ KASD-I GAZÂ KERDEN-İ SULTÂN BÂYEZÎD
 
Fâilâtün/Fâilâtün/Fâilâtün/Fâilün
 
1. Hazret-i şâh-ı cihân ider diyü azm-i gazâ
Birbirine muştılar gökde melâyik Hüsrevâ
2. Sen şeh-i devrân ile azm-i gazâ itmeklige
Cem idüpdür leşker-i ervâhı rûh-ı Mustafâ
3. Hıdmetünce bile bulunmaga bu hayr işde çarh
Subh-dem gördüm ki yakınmış şafak birle hınâ
4. Devlet anun kim rikâbunca bu îd-i ekbere
Yüz süriyü yetişür mânend-i sultân-ı semâ
5. Her ne denlü irmez ise hıdmete şâhâ elüm
Gönderürem reh-revân-ı subh ile her dem duâ
6. Kalb-i adânı aceb mi kılsa âvâzun şikest
Târ u mâr olur belî şâhîn ile zâğ-ı semâ
 
7. Gerd-i râh-ı bâd-pâyun devletine irmege
Her seher-geh görürem ayup gider bâd-ı sabâ
8. Şâh-ı heft iklîmsin sana mutî olmayana
Hîc kimse âlem içre sıhhati görmez revâ
9. Abdalân-ı Rûm pîri birle gönlüm [de] Münîr
Gitdi ol sultân-ı dervîşân u devrândan yana
10. Hazret-i şeh Bâyezîd ibn-i Mehemmed hân içün
Fikrün itmekse duâ ey dil di işündür n’ola
11. Sâye-i Hakdur vücûdı zıllini memdûd idüp
Ber-mezîd itsün cihânda devlet ü ömrin Hudâ
 
Ersen ERSOY,  II. BAYEZİD DEVRİ ŞÂİRLERİNDEN MÜNÎRÎ HAYATI,ESERLERİ VE DÎVÂNI (İNCELEME-TENKİTLİ METİN) https://ekitap.kulturturizm.gov.tr/Eklenti/10631,muniripdf.pdf?0