[fe’ilâtün fe’ilâtün fe’ilâtün fe’ilün]

 

Derd-i hicrân ile kaldum nideyin âh meded
Çâre-sâz ol bana öldüm meded Allâh meded

 

Mededüm yok meded öldüm turam ol yâra varam
İderem derd ile nâle ki direm âh meded

 

Subh-veş sâdık iken ben reh-i ‘ışkunda senün
Gelüp ahşamlamadun bir gice ey mâh meded

 

Hey müselmânlar esirgen reh-i dil-berde hasûd
Yolum aldı benüm ol kâfer-i güm-râh meded

 

Pây-mâl itme beni zulm ile Rahmî kuluna
Dest-gîr ol bana ayakdayam ey şâh meded