Devletlü ol kişi ki senüñ bigi yârı var

 

Devletlü ol kişi ki senüñ bigi yârı var (191/1)

Hurrem göñül ki bir saña beñzer nigârı var

 

Her kim ale’s-sabâh duruban cemâlüñe (191/2)

Togru nazar ide zi latîf rûzigârı var

 

Göñlüm cihân içinde seni kıldı ihtiyâr (191/3)

Rahmet bu göñlüme ki ne hûb ihtiyârı var

 

Cân diledüm kılam kademüñe fidî velî (191/4)

Cân kim olur orada ki ayaguñ gubârı var

 

Ne kılayım nisâr saña ki ayaguñ tozı (191/5)

Tâcına pâdişâhlarun iftihârı var

 

Cânuma kasd eyledi zülfüñ seza-durur (191/6)

Aña ki bî-karâr-ıla ahd ü karârı var

 

Gerçi bu şehr Ahmedî kanına teşnedür (191/7)

Hoş şehrdür senüñ bigi çün şehriyârı var

 

 

Dr. Yaşar AKDOĞAN, Ahmedî DÎVÂNI, T. C. KÜLTÜR VE TURİZM BAKANLIĞI, 3141 KÜLTÜR ESERLERİ 424