Mef`ûlü fâ`ilâtü mefâ`îlü fâ`ilün

 

 1 Dil-ber giceyle gelse rakîb âgeh olmasa

 Ol rû-siyâh sâye gibi hem-reh olmasa

 2 Nahl-i emel ne denlü dırâz olsa hûb idi

 Dest-i hayât u kadd-i bekâ kûteh olmasa

 3 Zâhid bu denlü sıklet-i tâc u kabâ ile

 Uçmak ümîdin itmez idi ebleh olmasa

 4 Ma`mûrdur mülâhaza-i yârla gönül

 Hâlüm harâb olurdı eger ol şeh olmasa

 5 Benzetmez idi rûyına Yahyâ gül-i teri

 Ezhâr içinde cümleden ol eşbeh olmasa

 

 

Hasan KAVRUK , ŞEYHÜLİSLAM YAHYÂ DÎVÂNI,  T. C. KÜLTÜR VE TURİZM BAKANLIĞI KÜTÜPHANELER VE YAYIMLAR GENEL MÜDÜRLÜĞÜ 3147